lan heriotza

Beste garraiolari bat hil da, oraingoan Lodosan (Nafarroa)

2024/09/27

ELAk beste lan heriotza bat salatu du. Irailaren 26an gertatu zen ezbeharra, Lodosan (Nafarroa), 56 urteko garraiolari batek istripua izan zuenean. Sindikatuak berehala eskatu du gertatutakoa aitortu dadila lan istripu gisa; izan ere, garraiolarien lan istripuak trafiko istripu gisa edo heriotz natural gisa erregistratzen dira askotan. Honekin, 2024an Nafarroan 14 hildako izan dira, horietatik 5 garraiolariak. “Datu horiek ez dira inolaz ere kasualitatea”, dio sindikatuak. Azaldu duenez, sektoreko langileek pairatzen dituzten desregulazioak eta eskubide ezak lotura zuzena dute ezbehar tasaren igoerarekin, eta lana galtzeko beldurrez jasan behar izaten dituzten gehiegizko jardunaldi, ordutegi eta presak gidarien osasuna eta bizitza arriskuan jartzen dute etengabean.

Egoeraren larrituasunaren aurrean, “enpresaburuen eta Nafarroako Gobernuaren inpunitatea eta konplizitatea onartezinak” dira ELArentzat. “Haien helburua garraio zerbitzu ahalik eta merkeena lortzea da, edozein preziotan. Lan-osasunean ere, oro har, patronala eta Gobernua eskutik doaz”, dio.

ELAren iritziz, bada garaia garraio sektoreko lan-baldintzak arautu eta duintzeko. Bada garaia baita ere, 2018an Nafarroako Parlamentuak onartu bezala, lan-ikuskaritzaren eskumena berreskuratu eta honen baliabideak hirukoizteko, Europako bataz-bestekora berdinduz. Eta bada garaia murrizketekin amaitzeko, eta 2018an onartutako amiantoa kentzeko plana abian jartzeko.

Horregatik, hildako bakar bat dagoen bitartean mobilizatzen jarraituko du ELAk, “enpresaburuen inpunitatea eta Nafarroako Gobernuaren konplizitatea salatzeko”.