ELAk CENeren kanpaina salatu du langileak egiten dituelako siniestralitatearen erantzunkide

Nafarroako Enpresaburuen Konfederazioak "informazio eta sentsibilizazio" kanpaina bat aurkeztu du laneko ezbeharren inguruan, eta Nafarroako Gobernuak finantzatuko du diru publikoarekin. Kanpaina honetan, enpresa ezberdinei "sormen-kit" bat bidaliko zaie. Kit horrek kasko bat, errotuladoreak eta diptiko bat izango ditu.

Prentsaurrekoan, Nafarroako Gobernuko Gizarte Ekonomiaren eta Lanaren zuzendari nagusiak ere parte hartu du. ELAk CENen eta Nafarroako Gobernuaren arduragabekeria salatu du lan istripu tasa altuari dagokionez.

Lau hilabetean 12 pertsona hil dira lan istripuz, Nafarroak du estatuko laneko heriotza tasarik altuena, eta heriotzen herena erorikoen edo harrapatzeen ondorioz da, prebentzio araudia betez gero saihestu izan litezkeenak. "Sormen-Kit" bat bidaltzea edo "lanean babestea norberaren erabakia dela, eta pertsona bakoitzaren janzkeraren eta jarrera profesionalaren parte dela" esatea iraingarria da ELAren esanetan.

Sindikatuak dio CENek eta Nafarroako Gobernuak "erantzukizun partekatu" gisa tratatzen dutela siniestralitatea. “Ez dago erantzukizun partekaturik lan harremanetan. Enpresek prebentzio araudia sistematikoki ez dute betetzen (segurtasun neurriak hartzeari uko egiten diotelako onurak handitzeko), eta langileek jasaten dituzten istripuak eta gaixotasunak eragiten dituzte”.

ELAk gogor kritikatu du UGTk eta CCOOk prebentzioko lurralde ordezkariaren bitartez patronalarekin duten aliantza. UGTk eta CCOOk hauteskunde sindikalak egiteko erabiltzen dute figura hori, eta ez prebentzioa hobetzeko, eta horrek patronalari ere mesede egiten dio.

ELAk aldarrikatu du ikuskapen bitartekoak 45 pertsonaraino handitzea, Europako batez besteko ratioarekin berdinduz.