ELAk hitzarmena sinatuko du patronalek erosahalmena bermatzen badute

ELAk ez du Nafarroako egoitza eta eguneko zentroetako hitzarmenaren aurreakordioa sinatu, langileen erosahalmena galtzeko arriskua dagoela uste duelako. Sindikatuak salatu duenez, testuak ez du bermatzen soldatak KPIaren arabera eguneratuko direnik 2027tik 2030era bitartean, eta klausula hori idatziz jasotzea eskatu du akordioa babestu aurretik.

Patronalek gai hori negoziatzeko prestutasuna azaldu bazuten ere, ez zuten aurreakordioan txertatu, ezta konpromiso formalik hartu ere. Gainerako sindikatuek, berriz, KPIaren bermea eskatu gabe babestu zuten testua; horregatik erabaki zuen ELAk ez sinatzea.

Aste honetan, ELAk hainbat batzar egin ditu Nafarroa osoan afiliatu eta ordezkariekin, eta parte-hartzaileek babestu egin dute KPIaren klausula bermatu gabe hitzarmena ez sinatzeko erabakia. ELAk patronalei, Nafarroako Gobernuari eta gainerako sindikatuei eskatu die aldarrikapen hori jaso dezatela azken akordioa hobetzeko.

ELAren arabera, aurreakordioak aurrerapausoak dakartza eta orain arte sektorean indarrean zegoen Estatuko hitzarmena nabarmen hobetzen du. Halaber, gogorarazi du lorpen horiek 2020tik egindako mobilizazioen eta 22 greba egunen ondorio direla. Hala ere, uste du negoziazioak oraindik zabalik daudela eta KPIaren bermea txertatzea bidezko eta posible den hobekuntza dela.