ELAk ohartarazten du El Vergeleko langileak zentroa uzten ari direla Zuzendaritzak lan-baldintzak okertu dituelako

Vergel eraldaketa-prozesu batean murgilduta dago, Pertsonarengan zentratutako arreta deiturikoa. 2019. urtean zehar, langileak eredu horren inguruan prestatzen hasi ziren. Baina 2020ko maiatzaren hasieran, Covid-19ak sortutako pandemiak eragindako konfinamenduan, aldez aurretik abisatu eta planifikatu gabe, lantokiaren funtzionamendua erabat berrantolatu zuen zuzendaritzak; langileen txandak aldatu ziren, lanaldiak aldatu eta sortu ziren, egoiliarren profil berriak sartu ziren, etab.

Ondorioz, langileen lan-karga nabarmen handitu zen, baina plantillak ez ziren egokitu egindako aldaketetara, ezta antolaketa berrira ere. Horrek, Covid 19ak eskatzen dituen garbiketa- eta desinfekzio-zereginekin batera, higadura nabarmena ekarri die langile guztiei.

Egoera jasanezin horren ondorioz eta lekualdaketa-prozesuen bidez, zentrotik joan dira horretarako aukera izan duten langile guztiak. Horregatik, gaur egun, El Vergel zentroan Zerbitzu Orokorretako plantillaren ia % 100 eta zaintzaile gerontologikoen% 80, aldi baterako kontratatuak dira.

ELAk, ANADPrekin otsailaren 16an egindako Mahai Sektorialean defendatu dugun bezala, langileei entzutea eta aldaketa berrien benetako plangintza eta kudeaketa egotea eskatzen du: plantilla handitzea behar berriei erantzuteko eta eskubideen galera lehengoratzeko. Onartezina da langileek ihes egitea, urteetako esperientzia duten pertsonak, orain arte beren lanpostuetan gustura zeudenak eta zentro honetan etorkizun posiblerik ikusi ez dutenak.