ELAk sektore publikoko Icetaren Lege Proiektuari aurkeztutako zuzenketak publiko egiteko eskatu du

2021/09/24
ELAk Nafarroako alderdi politikoei eskatu die Icetak sektore publikoaren behin-behinekotasuna murrizteko asmoz abian jarritako Lege Proiektuari aurkeztutako zuzenketak publikoki azaltzea. Gogorarazi du zuzenketen edukiek baldintzatuko dutela aldi baterako 15.000 langile baino gehiagoren enplegua finkatzeko bide bat irekitzea edo ez.

Azken asteetan, ELA harremanetan egon da alderdi politikoekin, zuzenketetan honako neurri hauek sar daitezen eskatzeko: birjarpen-tasak kentzea, gure herrialdean enplegu publikoaren arloko beharrak erabakitzeko, enplegu publikoaren suntsipena eta prekaritatea amaitzeko, enplegu publikoa sortzeko eta pribatizatutako zerbitzu publikoak lehengoratzeko; benetako finkatze-prozesuak eta prozesu bermatzaileak egiteko oztopo guztiak ezabatzea; eta egungo egoera ez errepikatzeko neurriak hartzea.

Era berean, ELAk hainbat bilera egin ditu kolektibo eta sindikatuekin, sektore publikoan mobilizazioa bultzatzen jarraitzeko, behin-behinekotasunaren gaitza pairatzen duten 15.000 langile publiko baino gehiagoren enplegua kontsolidatzeko, zerbitzu publikoak indartzeko eta pribatizazioari ateak ixteko.

Lege-proiektua Legebiltzarreko izapidean dago orain, zuzenketak aurkezteko epean; epe hori hiru aldiz luzatu da, nahiz eta proiektu honek presako prozedurari jarraitzen dion. Luzapen berri honekin, zuzenketen tramitea irailaren 29an amaituko da -beste atzerapenik ez badago-.