ELAk eta LABek erregeen presentzia arbuiatu dute Nafarroan

Gaur, Espainiako erregeak Aspaceko Ramon y Cajal eguneko zentroan izan dira Zizur Txikian. Testuinguru horretan, ELA eta LAB sindikatuok monarkiarekiko erabateko gaitzespena adierazi dugu, eta nabarmendu dute Nafarroan ez direla ondo hartzen, eta, horregatik, elkarretaratzea egin dugu lantokiaren aurrean.


Espainiako monarkia pairatzen ari garen osasun-krisia eta gizarte-larrialdiko krisia aurpegia garbitzeko erabiltzen ari da, enegarren ustelkeria kasu borboniarraren ostean. Zerbait onartezina eta zitala.

Ez langileok, ez erabiltzaileok, ez dugu errege eta erregina ustelen bisitarik behar. Giza baliabide eta baliabide material nahikoak eta egokiak behar ditugu, eta lan-baldintza duinak behar ditugu erabiltzaileei bizitza duina bermatuko dien kalitatezko zerbitzua eman ahal izateko. Hauek dira gure benetako beharrak eta erronka.

Ez da kasualitatea Espainiako erregeak Nafarroara etortzen direnean enpresari nafarrek gonbidatuta egitea edo aukera baliatzea enpresaren bat bisitatzeko. Batzuek menekoak nahi dituzte eta besteek esklaboak. Lurralde honetan oso ondo dakigu kapitalaren eta monarkiaren arteko aliantza honek zer suposatzen duen: eskubide eta askatasun falta, prekarietatea eta pobrezia handia. Bestela esanda, 78ko erregimena egoera puruan: errepresioa, eliteentzako pribilegioak, dietak, komisioak, enpresarientzako ordainketak beste mesede batzuen truke.

Espainiako trantsizio politikoak, eredugarritzat jotzen dutena, monarkia berrezartzea ekarri zuen, Francok aginduta eta hil eta bi egunera. Hala, Espainiako konstituzioak ezarritako borboien bortxaezintasunak, monarkiaren aldeko propaganda negargarriko lau hamarkadekin batera, borboien aberastea, ustelkeria eta eragiten dioten eskandaluak ahalbidetu ditu, edo borboiek eskrupulurik gabeko enpresariekin eta nazioarteko diktadore odoltsuekin duten harremana. Uste dugu 78ko sistema eta erregimen horrek ezin diola entzungor egiten jarraitu berroneratzeko eta konponbide demokratikorako premiazko beharrari.

Nafarroako gizarteak ezin izan du inoiz erabaki bere Autonomia Estatutua, Foruaren Hobekuntza deiturikoa, "Dena lotuta eta ondo lotuta" mantentzeko, eta hainbat belaunaldik Espainiako konstituzioa jasan dute, bozkatu ere egin ez zutena. Beraz, gure etorkizuna erabakitzeko garaia da.