Gazteen %30 langabezian dago

2023/07/27
Landunak aurreko hiruhilekoan baino 11.400 gehiago izan ziren, eta urte arteko alderaketak erakusten du duela urtebete baino hobeto gaudela, 3.700 landun gehiago baitaude. Inkestaren arabera, 296.200 landun daude, azken urteetako kopururik altuena. Enpleguaren igoera zerbitzuen sektoreak bultzatu du (+10.400), eta neurri txikiagoan industriak (+1.200); aitzitik, eraikuntzaren sektoreak enplegua suntsitu du berriro ere (-1.100).

Kontratuen behin-behinekotasunari erreparatzen badiogu, ikusi dezakegu azken hiruhilekoan kontratu mota hori duten pertsonak 5.500 gehiago izan direla, eta iraupen mugagabekoak ere 5.700 gehiago izan dira. Beraz, behin-behinekotasun-tasa puntu eta erdi igo da, %19ra arte. Esan behar da, emakumeek prekarietate handiagoa pairatzen dutela, behin-behinekotasun-tasa %22ra igo baita. Baita ere azpimarratu behar da sektore publikoko tasak oso altua izaten jarraitzen duela, % 38ra iritsi da dagoeneko.

Emakumeei gehiago eragiten dien beste gai bat nahi gabeko lanaldi partziala da. Lau emakumetik batek ( %26) lanaldi partzialeko kontratua du; gizonen artean, berriz, tasa %7koa da. Hori da emakumeek lan-eremuan jasaten duten diskriminazioaren beste erakusle bat.

Langabeziari dagokionez, 28.500 langabe daude, hau da, 10.800 pertsona gutxiago aurreko hiruhilekoan baino. Horrela, langabezia-tasa %8,8ra jaitsi da ( %9,7 emakumeen artean eta %8 gizonen artean). Aipatzekoa da gazteen egoera prekarioa; izan ere, gazteen langabezia-tasak gora egin du berriro, eta % 29,9ra iritsi da.

Oro har, datu positiboak ditugula ondoriozta dezakegu; hala ere, sortutako enpleguaren zati bat enplegu prekarioaren eta urtaroaren araberakoa izan da. Gainera, adierazi behar da behin-behinekotasuna %20 ingurukoa dela berriro, eta gazteen langabezia-tasak oso altua izaten jarraitzen duela.