Gazteen arteko langabezia %47 hazi da otsailetik Nafarroan

Aurreko hilean gertatu zen bezala, Nafarroan gora egin du langabeziak. Azaroko datuek erakusten dute langabeen kopurua % 1,6 igo dela urriko datuekin alderatuta, guztira 39.527 langabe izanik. Langabezia gehien hazi den sektorea industria izan da (%2,2 gehiago, hau da, 112 langabe gehiago), ondoren zerbitzuen sektorea (%1,74 gehiago, 448 langabe gehiago) eta azkenik eraikuntza (%1,6 gehiago). Nekazaritza izan da langabezia murriztu duen sektore bakarra (-% 1,9).

Urte arteko datuei dagokienez, 2019ko azaroarekin alderatuta, langabezia % 22 hazi da. Duela urtebete baino 7.111 langabe gehiago daude Nafarroan.

Bestalde, langabeen % 58 emakumeak dira. Ehuneko horrek gora egin du pandemia hasi zenetik, eta horrek erakusten du langabeziak eragin handiagoa duela emakumeengan gizonengan baino. Gazteen langabeziak gora egin du berriro 170 pertsonetan (+% 3,8). Kopuru horiek gazteenak bizitzen ari diren egiturazko arazoa areagotzen dute. Prekarietatearen arazoari 4.685 pertsonari eragiten dien langabezia gehitu behar zaio; horrek esan nahi du gazteen langabezia % 47,1 igo dela otsailetik hona.

Pandemiaren bigarren bolada honen aurrean eta ziurgabetasun-testuinguru honetan, langileen klaseak administrazioen aldetik neurriak behar ditu. Beste enplegu-politika batzuk behar dira, ekoizpen-eredua aldatuko dutenak eta enplegua baldintza duinetan sortu eta finkatuko dutenak. Horretarako, inbertsio handiagoa egin behar da sektore publikoan, eta gobernuek inplikazio handiagoa izan behar dute sektore estrategikoetan. Neurri horiekin batera, enplegurik gabe gelditu direnei, diru-sarrera urriak dituztenei eta pandemia aurretik ere egoera larrian zeuden kolektiboei prestazio eta zerbitzu duinak bermatu behar zaizkie, pobrezia-egoerak saihesteko.