Erabateko jarraipena du Leitzako Torraspapel enpresan gaur hasi den greba mugagabeak
Hitzarmenaren negoziazioan dagoen blokeoa gainditzeko eta enpresaren jarrera aldatzeko greba mugagabeak langileen %90aren babesa izan du.
Enpresa batzordearen oharra:
"Leitzako Torraspapel enpresako enpresa-batzordeak, langileekin batera, greba mugagabea hasi zuen, hitzarmen txukun bat lortzeko helburuarekin.
Gaurko egunean, hemen gaudenok, Leitzako Torraspapel enpresako enpresa-batzordeko kideok, enpresan bizi dugun blokeo egoeraren eta datozen egunetan hartu beharreko neurrien berri eman nahi diogu iritzi publikoari.
Lehenik eta behin, atzo egin ziren batzarretan jasotako greba-deialdiari emandako gehiengoaren babesa azpimarratu behar dugu. Batzar horietan parte hartu zuten pertsonen % 90ek grebaren alde egin zuten, 256 aldeko botorekin.
Grebari emandako babes horrek agerian uzten du langileen gehiengoak sumatzen duela LECTA taldeko TORRASPAPEL enpresak oraindik ere etekin handiak lortzen dituela, eta ez duela langileen aldarrikapen nagusiei irtenbidea bilatzeko borondaterik.
Urteak daramatzagu enpresarekin akordioak lortzen, eta inbertsioak eta erretiroak aitzakiatzat hartuta, soldaten moderazioa ekarri dute plantillarentzat, eta, gainera, urte asko daramatzate lanaldia murriztu gabe.
Horregatik, batzordeak hainbat helburu jarri zituen hitzarmen hau negoziatzeko:
- Langileen erosteko ahalmenari eustea eta hobetzea, Leitzan aberastasuna hobeto banatzeko.
- Urteko lanaldia murriztea, langileen bizi-baldintzak eta bateragarritasuna hobetzeko.
- ABLEen bidez egindako aldi baterako kontratazioari muga jartzea.
- Kategoria baxuenen egoera hobetzea, genero-arrakala kentzeko bidean aurrera eginez; izan ere, gaur egun, lan horietan, enpresako gogorrenak direnez, eragindako pertsona gehienak emakumeak dira.
- Lizentziak hobetzea, gure gizartean dauden errealitate berriak aitortuz.
- Ultraktibitate mugagabea.
Astelehenean bilera bat izan genuen enpresarekin, bertan, aurrera egin beharrean, atzerapausoa izan zen negoziazioan. Bilera horretan, fabrikako atal batean bi txanda kentzeko aukera zegoela jakinarazi zigun enpresak, produkzioari eta eskaerei buruz. Gure ustez, erabaki hori suari egur gehiago botatzea da, eta enpresaren presio-elementua da.
Uste dugu hitzarmenaren negoziazioan dagoen blokeoa ez dela ona, ez digu mesederik egiten ez guri ez enpresari, hemen gaudenok greban gaude borroka egitea beste erremediorik ez zaigulako geratu.
Horregatik guztiagatik, adierazi nahi dugu borrokan bat eginda gaudela eta borrokatzeko prest gaudela, azaldutako helburuei aurre egingo dien akordio bat lortu arte. Ostiralean bilera bat dugu enpresarekin eta bertan izango gara azaldutako aldarrikapenei irtenbidea emango dien hitzarmen bat lortzeko helburuarekin.
Akordiorik ez dagoen bitartean, grebari eutsiko diogu eta borroka horrekiko elkartasuna eta konpromisoa adierazi nahi duen orori dei egiten diogu larunbat honetan bertan 12: 00etan Leitzan egingo den manifestaziora."