Casa Otano (Iruña)

Kaleratzeen espedientea inposatu dute langileez libratzeko eta negozioa saltzeko

2024/06/04
Iruñeko Casa Otano taberna-jatetxea kudeatzen duen enpresak EEE bat aurkeztu zuen langile guztiak kaleratzeko, eta datozen Sanferminen aurreko egunetarako ixtea iragarri zuen, nahiz eta jarduera handieneko egunak izan, eta erreserbak egun horietarako ez ezik, datozen hilabeteetarako ere eginda izan. Casa Otanok argudiatutako arrazoia eraikinaren jabeak errentamenduaren amaiera iragarri izana zen arren, errealitatea bestelakoa da. Gogoan izan behar da eraikinaren jabea taberna-jatetxea kudeatzen duen familia berekoa dela. Plantillako 18 langileak kaleratzeko benetako arrazoia eraikinaren salmenta da, hau da, negozio bideragarri bat itxi eta enplegua suntsitzearen kontura higiezinen negozioa egitea.

San Nicolás kaleko Casa Otano kaleko taberna-jatetxe historikoaren itxiera eta enplegu-suntsiketa salatu ditu ELAk. ELAk beti egin du Casa Otanon enplegua mantentzearen aldeko apustua, eta horregatik amaitu da EEEaren kontsultaldia, akordiorik gabe.

Hala ere, sindikatuaren esku-hartzeak eta horren ondoriozko mobilizazioak langile guztien kalte ordaina handitzera behartu du enpresa, lan egindako urte bakoitzeko 20 eguneko kalte ordaina izatetik 45 egunekoa izatera. Horrek esan nahi du plantillak legeriak ezarritakoa baino 700.000 euro gehiago kobratuko dituela, batez beste ia 39.000 euro gehiago pertsona bakoitzeko.

ELAk langileen borroka eta antolaketa nabarmendu nahi ditu. Enplegua bermatzeko helburu nagusia lortu ez bada ere, borroka horri esker Casa Otanoko langileen egoera ekonomikoa nabarmen hobetu da.