GREBA NAFARROAKO HEZKUNTZAN

Maria Chivite presidenteari eskatu diote zuzenean sindikatuekin negoziatu dezan

2023/03/20
Apirilaren 3rako Nafarroako Hezkuntzan deitutako grebaren atarian, LABek, STEILASek, CCOOk, ELAk eta UGTk sindikatuekin zuzenean negoziatzeko deia egin diote Maria Chivite presidenteari, Hezkuntza Sailak jarrera “arduragabea” erakutsi dutela iritzita. Izan ere, Hezkuntzako kontseilaria eta Hezkuntza Baliabideen zuzendari nagusia ez ziren joan martxoaren 17an izandako azken negoziazio bilerara. Sindikatuek gogorarazi dute ez dela negoziaziorako galdutako aukera bakarra; izan ere, martxoaren 6an, greba deialdiarekin batera, bilera bat eskatu zioten Hezkuntza Sailari, baina ez zuten erantzunik jaso. Hala eta guztiz ere, sindikatuek negoziatzeko borondatea agertu dute berriro, baina beren jarrera berretsi dute: ez dute amore emango hezkuntzaren kalitatea mantentzeko eta hobetzeko funtsezkotzat jotzen dituzten oinarrizko aldarrikapenetan. Lortu arte, mobilizazio guztiekin jarraituko dutela ziurtatu dute.

LABek, STEILASek, CCOOk, ELAk eta UGTk deitoratu egin dute martxoaren 17ko bileran Hezkuntza Sailak mahai gainean jarri ez izana sindikatuen aldarrikapenei erantzuteko proposamenik: ratioen jaitsiera lineala; langainkarga murriztea; langileen egonkortasuna handitzea; eta erosahalmena berreskuratzea. “Aurrerapenak proposatu ordez, argi utzi zuten ez dutela inbertsio ekonomikorik ekarriko duen ezer negoziatuko, azken hilabeteetan administrazioko beste kolektibo batzuekin lan baldintzen hobekuntzak eta soldata igoera negoziatu direnean. Hezkuntza publikoak ez al du inbertsio gehiago merezi?”, kexu dira.

Bestalde, astebetean irakasle taldeen 40 batzar egin dira aldarrikapen horiek eztabaidatzeko, eta hurrengo egunetan 100 bilera egitea aurreikusten da. Irakasleek aldarrikapenekin bat egiten dutela ziurtatu dute, eta dagoeneko klaustro askok bat egin dutela aldarrikapen horiekin.