Mitxel Lakuntza: “Nafarroan gehien irabazten duten enpresak dira zerga gutxien ordaintzen dutenak”
'Zerga-sistema iraultzeko unea da' lemapean, ELAk kontzentrazioa egin du Nafarroako Parlamentuaren aurrean, fiskalitate kanpainaren barruan. Mitxel Lakuntzak ziurtatu du erreforma fiskala inoiz baino beharrezkoagoa dela, krisiak ezberdintasunak eta premia sozial larriak eragin baititu. “Justizia sozialagatik ez ezik, krisiari irtebidea emateko bidea ere bada”.
Izan ere, Lakuntzak dio ez gaudela “denok” krisian, baliabide ekonomikoak izan arren, krisia “betikoak” ordaintzen ari dielako. Izan ere, enpresa handiek apenas ordaintzen dute zergarik: irabazten dituzten 10 euroetatik bat. Eta langileak dira ekarpen handiena egiten dutenak: jornalen zuzeneko zergetatik datoz ogasunak jasotzen dituen lau euroetatik hiru. Egoera hori hautu politiko baten ondorioa dela azpimarratu du: “Nafarroan, zenbat eta diru gehiago izan, orduan eta zerga gutxiago ordaintzen dira, eta haiek ordaintzen ez dutena guk ordaindu behar dugu. Bidegabekeria hori amaitzeko erreforma fiskala behar dugu”.
Lakuntzak gogorarazi duenez, “sei urte igaro dira UPN Gobernutik atera zenetik, baina Barcinak utzi zuen ia fiskalitate bera dugu; orain, Chiviteren Gobernuak fiskalitateari buruzko aditu-batzorde bat sortu du, eta uste dugu propaganda-ariketa bat besterik ez dela izango. Izan ere, aldaketa fiskal bakarra Enpresa Ondarearen gaineko Zerga kentzea izan da, patronalak eskatu bezala”. Lakuntzak gaineratu du Foru Gobernua “austeritate-politika guztiak bere gain hartzen ari dela, eta ezkerreko ezein alderdik ez diola aurka egiten aurrekontuen eta zergen arloan. ELAk proposamenak ditu, besteak beste, Sozietateen gaineko Zergaren gutxieneko tasa %25ekoa izatea edo Ondarearen gaineko errekargu progresiboa izatea. Eginbehar politiko eta etikoa da: gehien duenak herrialdea egiten laguntzea”.
Bestalde, Imanol Pascual Nafarroako ELAko koordinatzaileak nabarmendu du “Nafarroako enpresa nagusietako hamarrek (Acciona, AN, Azkoyen, Faurecia, TRW, Virto, Uvesa, Vegamayor, Viscofan eta VW) 335 milioiko mozkinak izan zituztela 2019an, baina horren % 11,7 baino ez dute ordaintzen. Eta, gaineratu duenez, “Foru Gobernuak oraintsu esan du ez dela zergak ukitzeko unea. Bozeramalea harro azaldu da Nafarroa delako presio fiskal txikiena duen lurraldea”.
Saioa Urriza Iruñerriko ELAren arduradunak, berriz, nabarmendu du “elkartasuna gizarte-borroken printzipioetako bat dela”, eta aurreko krisian eta egungo COVIDarekin gertatutakoa gogoratu du. “Eskarmentatua dugu jada, eta ez dugu onartuko krisiaren irteera aurrekoa bezalakoa izatea; beldurrarekin jokatzen dute, eta esaten digute zergak enpresa handiei igotzen badizkiete beste leku batera joango direla. Mehatxuez eta xantaiez badakigu zerbait, baina alternatiba posible eta bideragarri batez hitz egin nahi dugu; hemen eta orain”.