Nafarroako Gobernuak 701 milioi euro bideratuko ditu enpresen irabaziak handitzeko eta CCOO eta UGT finantzatzeko
Gogoratuko denez, Chiviteko Gobernuak (PSN, Geroa Bai eta Podemos) Enplegu Plan berria (2021-2024) sinatu zuen joan den astean CEN, CCOO eta UGTrekin, Elkarrizketa Sozialerako Kontseiluaren barruan; hori da Nafar Lansare Zerbitzuaren jarduera gidatuko duen dokumentua.
Diru publikoko 701 milioi euro horiei gehitu behar zaizkie 1998tik 2014ra bitartean helburu bera izan zuten 1.500 milioi euro baino gehiago; Comptos Ganberak zalantzan jarri zituen kopuru horiek, eta urte luzez CCOOko eta UGTko 100 liberatu sindikalen baino gehiagoren soldata ordaintzeko balio izan zuten, baita beren egoitzetako gastu orokorrak ordaintzeko ere (ura, telefonoa eta baita bulegoko materiala ere), hori guztia etengabeko formazioa pantaila gisa erabiliz.
Oraingo honetan, Gobernua, CEN, CCOO eta UGT ados jarri dira Lan Osasuneko lurralde-ordezkarien (1,2 milioi) eta berdintasun-agenteen (0,6 milioi) figurak sortzeko, baita "enpresetako ekintza sindikalari laguntzeko" beste 1,6 milioi ere. Kopuru horiek guztiak berriro baliatuko dira sindikatu sinatzaileen plantillen kostua ordaintzeko. Gainera, erabaki horiek funtsezko zerbitzu publikoak pribatizatzea dakarte, hala nola lan-osasuna eta genero-ekitatea.
ELAk duela urte asko erabaki zuen bezero-eredu horri aurre egitea, neurri batean aurreko legegintzaldian lortu zena, baina Nafarroako Enplegu Zerbitzu berriak berriro hartu ditu Sanz eta Barcinaren garaietako politikak: organo horretan parte hartzeak bezero-eredu hori legitimatzen du, eta milioika euro publiko esleitzen dizkio txiringitoak sortzeari, patronalaren, CCOOren eta UGTren mesedetan.
Adibide bat jartzearren, Enplegu Plan honen aurrekontuan, enpresentzako partidek – Lehiakortasunaren kontzeptua bakarrik kontuan hartuta – 417 milioi euro biltzen dituzte gutxienez, baina langile-klasearen onurarako planak makillaje hutsa dira, ez baitute ia inolako aurrekontu-esleipenik: prebentziorako kultura eta ezbehar-kopurua (200.000 euro), lanbide-heziketa (0), genero-tranbertsalitatea (69.000 euro), enpleguaren kalitatea (ia guztia enpresentzako diru-laguntzak dira), ingurumena (deskontaminazio-planentzako 0 euro)...
Hori gutxi balitz bezala, Gobernuak, CCOOk eta UGTk bere egiten dute patronalaren jarrera ideologikoa eta doktrinatzailea, Lehen Hezkuntzako eta DBHko ikasketa-planetan enpresen balioak eta fiskalitatea bezalako gaiak sartzea onartuz (ez da zaila asmatzea zein zentzutan). Gainera, "adin goiztiarreko geletan enpresarien presentzia bermatzea" adostu dute; hezkuntzan esku-hartze onartezina da.