Nafarroako laneko bide-ezbeharren indize handia gaitzesten du ELAk

2021/11/05
Patronalak lanarekin lotutako mugikortasunaren erantzukizuna bere gain hartzen ez duela salatu du ELAk, atzo, azaroaren 4an, N-150 errepidean (Nafarroa) in-itinere lan-istripuz Atarrabiako biztanle bat hil eta gero. Bide beretik, Nafarroako Gobernuari lurraldeko errepide sareko puntu beltzak ezabatzea exijitu dio. ELAk jakin ahal izan duenez, langileak Agoitzeko (Nafarroa) industrialdean dagoen enpresa batean egiten zuen lan. Sindikatuak, lehenik eta behin, babesa eta elkartasuna adierazi nahi die biktimaren senideei eta gertukoei, eta Nafarroako laneko bide-ezbeharren indize handia salatu nahi du.

2021ean 54 pertsona hil dira lan-istripuz Hego Euskal Herrian, horietatik 15 Nafarroan. Ildo horretan, irailaren 15ean, landa-eremuko langile bat hil zen Murillo el Fruton, auto batek harrapatuta, bizikletan lan egitera zihoala. Maiatzaren 28an, Diario de Navarra egunkariko langile bat ere hil zen lanetik bueltan zihoala beste auto batek harrapatuta. Apirilaren 23an, Mondélez eta Envaplasterreko bi langile hil ziren Vianan, beren ibilgailuek enpresen eta bizilekuaren arteko bidean talka egin ondoren.

Estatistika ofizialek arazoaren zati bat baino ez dute islatzen, eta hala ere, lan-istripu hilgarrien % 50 baino gehiagok lan-eremuan gertatzen diren zirkulazio-istripu ugariekin zerikusia dutela aitortzen dute (in itinere, in misió). Hala ere, patronalak sistematikoki beste alde batera begiratzen du. Gaur egun, oraindik ere, oso enpresa gutxik hartzen dituzte beren prebentzio-jardueran mugikortasun-planak edo langileen desplazamendua bultzatzeko beste ekintza batzuk.

NOPLOIk egin berri duen balantzeak aitortzen duenez, ez dago baliabide nahikorik 2017-2020 aldirako Lan Osasuneko Ekintza Plana gauzatzeko. Horren harira, nabarmentzekoa da Plan horren Bide Segurtasuneko Azpiprograman aurreikusitako neurririk apenas ezarri dela, arlo horretako ekintza espezifikoak jasotzen zituen arren. Nafarroako Gobernuak, hala ere, baliabide publikoak lan-osasuneko elkarrizketa sozial “klientelarrera eta ez-eraginkorrera” bideratzen jarraitzea aurreikusten du, Enplegu Planaren baitan 400.000 euro CEN, UGT eta CCOOko Prebentzioko Lurralde Ordezkariari esleituz.

Horren aurrean, ELAk lan-eremuan esku-hartze publikoa handitzeko premia berretsi du, laneko bide-ezbeharren kopurua handitzearen aurrean, lehentasunezko neurri gisa. Nafarroako Gobernuak bere proposamenak entzuteko biltzeari uko egiten dion bitartean, ELAk mobilizatzen jarraituko duela adierazi du, besteak beste, Gobernuak lurraldeko bide-sareko puntu beltzak kendu ditzan.