Sephora enpresa kondenatua, langileen adierazpen-askatasunerako eskubidea urratzeagatik

Sephora enpresak 16 eguneko lan eta soldata zigorra ezarri zien duela hilabete batzuk hiru langileri bideo batean parte hartzeagatik. Bideo horretan, umorez, enpresaren publizitate-kanpaina baten parodia egiten zen, haien lan-baldintzak salatuz.

Hala ere, zehapen hori baliogabetzat jo du Iruñeko Lan Arloko 3 zenbakiko Epaitegiak; izan ere, adierazpen-askatasunerako eskubidea babesten dio langileari, eta enpresak oinarrizko eskubide hori urratu du.

Gogoratu behar da lan-gatazka honetan zehar, Sephorak uko egin diola langileekin biltzeari, eta errepresioa isilarazten saiatu dela, zigorrak ezarriz eta grebalariak kaleratuz.

Epai hori da ELAk Sephoren aurka jarritako lehen salaketa. Langileen ordezkarien kaleratzeen inguruko epaiketak egiteko daude oraindik, eta, horietan, sindikatuak baliogabetzea eta lanpostuetan berehala onartzea eskatu du.

Era berean, ELAk, bere garaian iragarri bezala, 100.000 euroko kalte-ordaina eskatzen duen erreklamazio bat jarri du, sindikatuaren eta afiliatuen oinarrizko eskubideak larriki urratzeagatik.

Azkenik, langileen eskubideen defentsa berretsi du sindikatuak, eta gatazka horri elkarrizketaren bidetik irtenbide bat emateko eskatu dio Sephorari.