Siemens Gamesako zuzendaritzak erretiratu egin du enplegua iraungitzeko espedientea

2017/12/04
Gaur Siemens Gamesako zuzendaritzak jakinarazi die ordezkari sindikalei enplegua iraungitzeko espedientea erretiratu duela. Enpresak erabaki hori hartu behar izan du lantaldea 272 lankide kaleratzeko asmoaren aurka aurrez aurre jarri delako. Langileen erantzun irmoari esker zuzendaritzak aipatutako dosierrari dagokionez atzera egin behar izan du.

Gaur Siemens Gamesako zuzendaritzak jakinarazi die ordezkari sindikalei enplegua iraungitzeko espedientea erretiratu duela. Hau dela eta ELAk honakoa adierazi nahi du:

    • Enpresak erabaki hori hartu behar izan du lantaldea 272 lankide kaleratzeko asmoaren aurka aurrez aurre jarri delako. Langileen erantzun irmoari esker zuzendaritzak aipatutako dosierrari dagokionez atzera egin behar izan du.

    • Kezkatuta gaude enpresaren zuzendaritza noraezean dabilela ikusten dugulako; Siemensek eskuratu duenetik joera hori areagotu egin da, gainera. Hilabete gutxitan zeharo aldatu dira adierazpenak: Siemensek Gamesa erosi izana oso positiboa omen zen eta ez zegoen Gamesa hemen jarraitzeko arazorik; haatik, denbora gutxian aurreko zuzendaritza ia erabat desegin dute eta kaleratzeak iragarri dituzte, inolako justifikaziorik gabe.

    • Azken hiletako noraeza zuzentzea galdegiten dugu. Industri-plan bat finkatzeko unea da, enpresaren etorkizuna bermatu eta enplegua babesteko.

    • Azkenik, bejondeiela langileei beren enpleguaren eta lan-baldintzen alde tinko jokatu dutelako. Horixe da etorkizunean ere mantendu beharreko norabidea.