UGTk eta CCOOk, enpresa-batzordean gutxiengoa izanik, eraginkortasun mugatuko hitzarmen bat adostu dute Tasubinsan

2022/02/07
Guztiz antidemokratikoa izateaz gain, are larriagoa da enplegu-zentro berezi batean egitea, langileek enpresarekin banaka sinatu behar baitute hitzarmen hau aplika diezaieten.

LABek eta ELAk osatutako Tasubinsako Enpresa Batzordeko gehiengo sindikalak (21 ordezkarietatik 12) mobilizatu eta enpresako lan-baldintzak hobetzeko greba egiten zuten bitartean, UGT eta CCOO eraginkortasun mugatuko hitzarmen bat negoziatzen ari ziren langileen bizkar.

Guztiz antidemokratikoa da negoziazio kolektiboan Komitearen gehiengoa ez errespetatzea, langileek hauteskunde sindikaletan aukeratu dutenaren aurka joatea baita.

Tasubinsa Nafarroako enplegu-zentro berezi handiena da, eta 1.400 pertsonari baino gehiagori ematen zaie lana eta okupazioa, horietatik 1.200 desgaitasunen bat dutenak izanik. Diru publikoa jasotzen duen enpresa da, eta, beraz, Nafarroako Gobernuaren erantzukizuna ere zuzena da.

UGTk eta CCOOk lortutako eraginkortasun mugatuko hitzarmena sindikatu horietako afiliatuei baino ez zaie aplikatzen, eta gainerako langileei aplikatzeko, langile bakoitzak enpresarekin banaka sinatu beharko du hitzarmen honen aplikazioa. Guztiz salagarria da, are gehiago enplegu-zentro berezi batean, enplegatutako pertsona bakoitza enpresaren aurrean adieraztera behartzea.