ELAk zaintza duinak eta kalitatezkoak bermatuko dituen Nafarroako egoitzen hitzarmena exijitu du Iruñean

2021/01/20

Gizarte Eskubideen Departamentuaren aurrean egindako elkarretaratzean, egoitzetako eta zaintza-sektoreko langileek Nafarroako Gobernua jo dute zainketen eredu pribatizatu eta merkantilizatuaren arduradun zuzen. ELAk gogorarazi duenez, zaintza eredu profesional, publiko, duin, unibertsal eta doakoa lortzeko bidean, greba orokorra egingo da sektorean urtarrilaren 26an.

Adineko pertsonentzako egoitzetako eta eguneko zentroetako langileek eta zaintza-sektoreko langileek elkarretaratzea egin dute, ELAk deituta, Nafarroako Gobernuko Gizarte Eskubideen Departamentuaren aurrean, onura ekonomikoa pertsonen zaintzaren eta lan-baldintzen gainetik jartzen duen egungo zaintza-sisteman duen erantzukizun zuzena salatzeko. "Zaintza-sistema diru publikoz finantzatuta dago, eta, beraz, Nafarroako Gobernuaren erantzukizuna zuzena da", baieztatu du ELAk irmo.

Gehitu duenez, desgaitasunaren alorrean berriki adostutako hitzarmenak erakusten duenez, borondate politikoa badago, langileen baldintzak hobetu daitezke, eta, horrekin batera, zerbitzuaren kalitatea hobetu. "Ezinbestekoa da zaintzen dutenak zaintzea, zaintza duin eta kalitatezkoak izateko eskubidea bermatzeko", azpimarratu du.

Azaldu duenez, beharrezkoa da Nafarroako Egoitzetako Hitzarmena lortzea, zaintza profesional, publiko, duin, unibertsal eta doakoaren eredua lortzeko bidean. "Eta hori guztia langileen mobilizazioaren bidez baino ez da lortuko, urtarrilaren 26ko greba orokorraren bidez, esaterako", baieztatu du sindikatuak.