Ogasunak egindako zerga-bilketaren jaitsiera aurreikuspena ikusita, zerga erreformarik egiten ez bada murrizketak itzuliko dira

2020/09/17
Nafarroako Gobernuaren arabera 538 milioi euro gutxiago biltzen badira eta ez bada zerga erreformarik egiten, lehenengo, zor publikoa handituko da, eta gero murrizketak etorriko dira. Gauzak horrela, ELAren ustez beharrezkoa da diru-bilketa handitzea murrizketarik ez egoteko. Hori lortzeko sindikatuak proposatzen du kenkariak kenduz eta 2019ko Sozietateen gaineko Zergaren aitorpenean % 20ko errekargu berezi bat ezartzea, eta Ondarearen gaineko Zergan %1 eta %10 arteko errekargu progresiboa finkatzea. Horrela, 2020an 900 milioi euro gehiago bilduko lirateke.

Nafarroako Gobernuak 2020rako Ogasunaren diru-bilketaren aurreikuspena eguneratu du, eta 2019ko datuekin alderatuta, % 13,3ko aurreikusten du, 538,6 milioi eurokoa, hain zuzen ere. Era berean, defizitaren helburua %2,6ra igotzea adostu du, hau da, gehiago zorpetu ahal izatea.

Nafarroako zerga-sistemak Europako batez bestekoaren oso azpitik du diru-bilketa (EB-28ko batez bestekoa baino 1.640 milioi gutxiago), eta enpresak (batez ere handienak) eta errenta altuak eta kapital-errentak dira honen pribilegiatu nagusiak (Sozietateen gaineko Zergak 2007an baino %53,8 gutxiago bildu zuen 2019an, BPGa %20,1 handitu zen bitartean).

Nafarroako zerga-sistemaren arazoa bilketa arazoa da, ez gastuarena. Irtenbidea bilketaren igoera izan behar da, bestela 2008ko krisian aplikatu ziren errezeta berberak errepikatuko dira, hau da, zor publikoaren igoera (2007tik 2019ra %400 baino gehiago) eta murrizketak.