ELAk Argentinako Gobernuaren errepresio bortitza gaitzesten du

ELAk elkartasun osoa adierazi die Argentinako herriari, sindikatuei, pentsiodunen mugimenduari eta gizarte-erakunde guztiei, politika errepresiboak gorabehera, eskubideen defentsaren eta gizarte justuago baten alde borrokan eta manifestatzen jarraitzen baitute. Elkartasun osoa bidaltzen dio Pablo Grillori, erreportari grafiko gazteari, buruan gas negar-eragileko kartutxo batekin tiro bat jaso zuen eta bere bizitzaren alde borrokatzen ari dena.

Errepresioa eta indarkeria, bai eta Javier Mileiren gobernuak gehiengo sozialen aurka egiten dituen doikuntza ekonomikoko neurri basatiak ere, eskubideen hedapenaren eta justizia sozialaren aurkako ultraeskuin globalaren proiektu politikoaren beste adibide bat dira. Ideia politikoengatik jazartzea eta eskubide sozialen alde mobilizatzen direnen protesta soziala kriminalizatzeko ahalegina gertaera kezkagarria da, eta garai ilunetara bueltan garamatzate. Ziur gaude Argentinako herriak, beti izan duen indarrarekin eta determinazioarekin, mehatxatzen duen olatu erreakzionario honen kontra ahal izango duela.

Gertatzen ari denaren larritasuna ikusita, ELAk Argentinan giza eskubideak eta lan-eskubideak errespeta daitezen nazioarteko aldarriarekin bat egin du. Gainera, atxilotutako pertsonak askatzea exijitzen du, eta Pablo Grillo zauritu zuten gertakariak argitzeko eskatzen dio justiziari.