ALTERNATIBEN EUROPAKO ESPARRU BATERATUA

ELAk hainbat tailer antolatuko ditu Marseillako topaketetan

2024/04/25
Topaketa Marseillan izango da apirilaren 26tik 28ra bitartean, eta Europa soziala, feminista, arrazakeriaren aurkakoa, ekologista, baketsua eta demokratikoa eskatzen du. Hainbat erakunde sozial eta sindikalek, horien artean ELAk, Alternatiben Europako Esparru Bateratuan parte hartzeko deia egin dute. Gaur egun ez dago Europaren deriba neoliberal eta militaristarekin ados ez gauden eta Europa sozial, feminista, arrazismoaren aurkako, ekologista, baketsu eta demokratikoa eskatzen dugun erakunde sozial eta sindikalak biltzen dituen espaziorik.

Espazio honen lehen ekimena Marseillan izango da asteburu honetan. Apirilaren 26tik 28ra gure esperientziak eta erronkak partekatuko ditugu, eta elkarrekin ekimenak eta mobilizazioak garatzen saiatuko gara. ELAk hainbat tailer antolatu ditu, beste erakunde sindikal eta sozial batzuekin batera. Horietako bat, kapitalaren Europari aurre egiteko borroka sindikalei buruzkoa, lan-gatazka eta grebei buruzko esperientziak eta politika publikoak aldatzeko gizarte-mobilizazioko dinamikak jorratuko dituena. Beste batek sindikalismoa, enplegua eta trantsizio ekosoziala izango ditu hizpide. Krisi klimatikoak eragin zuzena izango du enpleguan, eta sindikalismoak eragile aktiboa izan behar du bidezko trantsizio ekosozialaren alde.

ELAren ordezkaritzak beste mintegi batzuetan ere parte hartuko du, mugimendu feministak, ekologistak edo legez kanpoko zorra indargabetzeko sareak antolatuta. Era berean, hurrengo hilabeteetan egin beharreko aliantzen, borroken eta mobilizazioen gaia landuko den une desberdinetan ere egongo gara.