SAHARA

ELAk UGTSARIO saharar sindikatuaren bisita izan du

2025/06/26
ELAk Mohamed Salem Hamma, UGTSARIOren Kanpo Harreman, Lankidetza, Hedabide eta Diasporako Arazoetarako arduradunaren bisita jaso du ekainaren 24an bi erakundeak lotzen dituzten elkartasun lotura sendoak berretsi eta indartzeko. ELAk berretsi egiten du saharar kausarekiko eta saharar herriaren autodeterminazio eskubidearekiko duen elkartasuna eta konpromisoa.

Mohamed Salem Hamma, ELAren Bilboko egoitzan bildu da Mitxel Lakuntza, idazkari nagusia; Amaia Muñoa, alboko idazkari nagusia eta Nazioarteko Harremanetako idazkaria; eta Leire Gallego, Gizarte Ekintzako idazkaria, eta Roser Espelt eta Eider Azkunaga, ELAko nazioarteko arloko kideekin.

Topaketak, bi erakundeen arteko harremana indartzeaz gain, saharar langileen egoera latzari buruz hitz egitea ahalbidetu du, baita okupazio marokoarraren espetxeetan preso dauden saharar preso politikoen egoerari buruz ere, eta bi erakundeen arteko elkarlanerako konpromisoa berretsi du, ekintza plan bateratu baten bidez.

Gainera, bilera horretan, erakunde bakoitzak bere kongresuetan lortutako emaitzak eta jarritako helburuak partekatu ahal izan zituen. UGTSARIOk X. Kongresua egin zuen apirilean eta ELAk XVI. Kongresua ekainean. Ildo horretan, bi erakundeek Saharako herriaren borrokarekin eta haren bidezko kausarekin lankidetza eta elkartasun sindikaleko ahaleginak areagotu egin behar direla azpimarratu zuten.