ELAk elkartasuna adierazi dio Palestinari
Gaur egun, inoiz baino zentzuzkoagoa da Palestinarekiko elkartasuna aldarrikatzea, Israelek Palestinako gizarte zibileko erakundeen aurka egiten duen kriminalizazio-kanpaina sistematikoaren aurrean, eta Palestinarekiko nazioarteko lankidetza eta ekintza humanitarioa zailtzen saiatzearen aurrean.
Gaurko egun hau gogoratzean, ELAk gogorarazi nahi du Palestinaren auzia oraindik ez dela konpondu; eta nazioarteko legedia bete dadila eta palestinarrek NBEren Batzar Nagusiak onartutako eskubide besterenezinak eskuratu ditzatela eskatzen du. Horien artean daude, besteak beste, determinazio librerako eskubidea, independentziarako eta subiranotasun nazionalerako eskubidea; eta palestinarrek beren etxeetara itzultzeko eta beren ondasunak berreskuratzeko duten eskubidea.