Udalak berriro azpikontratatuko du zerbitzua eta uko egingo dio langileak parekatzeari

Pasaiako Udalarekin hainbat hilabetez hitz egiten egon ondoren, Udalak uko egin dio Etxez Etxeko Laguntza Zerbitzuko (ELZ) langileak antzeko lanak egiten dituzten eta Udalak zuzenean kontratatzen dituen langileekin parekatzeari. Izan ere, lehiaketa bat argitaratu du zerbitzu hori kudeatzeko, hau da, zerbitzu publiko bat azpikontratatzen jarraitzeko. ELAk eta LABek "onartezintzat" jo dute erabaki hori, eta deitoratu egin du Udalak "diskriminazioa eta prekaritatean sakontzen jarraituko duela".

Izan ere, Pasaiako Udalak herritarrei ematen dien Etxez Etxeko Laguntza zerbitzua publikoa izan beharko litzateke, baina gaur egun, udalak enpresa pribatu bati azpikontratatzen dio. Horrenbestez, emakume langileek oso lan baldintza eskasak dituzte, eta diskriminazioa jasaten dute antzeko zereginak egiten dituzten gainerako langileen aldean. Horren ondorioz, 2025ean ez dute ordainsari igoerarik izango, eta ez dituzte bere lan baldintzak hobetuko.

Azken hilabeteetan sindikatuak bilerak egin ditu udalarekin, eta hark agintzen zuen bere lan-baldintzak parekatuko zituela eta bere hitzarmena hobetzeko behar zituen baliabide ekonomikoak jarriko zituela. Orain, ordea, kontrako erabakia hartu du.

“Erabaki honekin Udalak kendu digu gure lan baldintzak hobetuko dituen hitzarmen kolektibo bat negoziatzeko eskubidea. Prekaritatean egotera eta diskriminatuta jarraitzera kondenatu gaitu”, kexu dira.

Gauzak horrela, udalari eskatu diote bere gain har dezala zerbitzuaren erantzukizuna, eta jar ditzala behar diren bitartekoak sektoreko lan baldintzak hobetzeko

"Ez du balio zaintza sektore feminizatuko langileok pairatzen dugun prekarietate egoera salatzeko propaganda kanpainak egitea; egoera hori ezabatuko duten erabaki politikoak behar ditugu", diote.

Langileek adierazi dute mobilizatzen jarraituko dutela beren baldintzak hobetzea lortu arte.