Greba hasi da denda ixtearen erabakiaren aurka

ELAk deituta, greba hasi dute Urbil merkataritza guneko Tezenis dendako langileek, hilaren 30erako iragarritako itxieraren aurrean. Mobilizazioa itxiera egunera arte luzatuko da.

Franchising Calzedonia S.A. enpresak apirilaren 15ean jakinarazi zien hiru langileei denda itxiko zuela, arrazoi ekonomiko eta produktiboak argudiatuta. ELAren arabera, erabakia inolako negoziazio prozesurik abiatu gabe hartu da, eta ez da langileentzat bestelako aukerarik aztertu.

Sindikatuak azpimarratu du enpresak beste sei denda dituela Donostian (Tezenis, Intimissimi, Falconeri eta Calzedonia) eta, beraz, posible dela langileak beste establezimendu batzuetan birkokatzea.

ELAren ustez, egoera hau ez da isolatua merkataritza ehungintzaren sektorean. Azken urteotan ugaritu egin dira denda fisikoen itxierak, baita emaitza ekonomiko onak dituzten establezimenduetan ere, enpresen digitalizazioaren eta online salmenten aldeko apustuaren ondorioz. Besteak beste, markak 2024an Loiola kalean beste denda bat ere itxi zuen.

Grebaren bidez, langileek kaleratze behartuak saihestu eta taldearen barruan lanpostuei eusteko irtenbidea lortu nahi dute.