Gipuzkoako eraikin eta lokaletako garbikuntza

%40ko soldata arrakala salatu dute 5. greba egunean

2023/05/26
ELAk deitutako 5. greba egunean, Gipuzkoako eraikin eta lokaletako garbikuntza sektoreko langileek manifestazioa egin dute Donostian. Bertan salatu dute %40,46ko soldata arrakala dutela. Sektorea erabat feminizatuta dago, eta langileen %90 emakumeak dira. Taldeak 5.000 langile inguru ditu, eta bost urteko negoziazioen ostean jo dute grebara. ELAk oso balorazio positiboa egin du grebaren jarraipenaz, nahiz eta salatu gatazka ikusezin bihurtzeko ahaleginak egin diren. Gipuzkoako Foru Aldundiaren aurrean amaitu den manifestazioan, ELAk gogorarazi du bai patronalak bai erakunde kontratatzaileak direla sektorearen egoeraren erantzule. “Soldata arrakalak, partzialtasunak edo prekaritateak sistema matxista bati erantzuten diote, eta sistema horrek, beste behin ere, ez die baliorik ematen urteetan gizarte osoak ikusezin bihurtu eta gutxietsi dituen lanei”, salatu du ekitaldian.

Erantzukizunari dagokionez, ELAk azaldu du lehenik eta behin, patronalak daudela: Estatuko patronala, Aspel, sektorea are gehiago prekarizatu nahian dabil; eta Adegi, bere enpresa elkartuen bitartez, prekaritatea izoztu nahian. Bigarrenik, bezeroak aipatzen ditu, egoeraren zuzeneko konplizetzat jotzen baititu. Eta, azkenik, alderdi politikoak interpelatu ditu. Hauteskunde kanpainan 19.600 euroko gutxieneko soldataren proposama egiten dute, baina beren administrazioetan soldata txikiagoekin azpikontratatuta dituzte garbikuntzako langileak. “Ez dugu propaganda politikorik nahi, langileentzako benetako politikak nahi ditugu, desberdintasunarekin amaitzeko”, diote.

Langileek adierazi dute mobilizazioekin jarraituko dutela sektorearen prekaritatea amaitu arte.