Deustuko Unibertsitateko garbitzaileen greba, soldata-arrakala ezabatzeko hitzarmen bat eskatzeko

2021/11/09

Deustuko Unibertsitateko garbiketako langileek, Sodexo enpresarekin azpikontratatuta, azaroaren 9, 10, 11 eta 12rako deitutako lau greba-egunetako lehenengoan parte hartu dute. Greba honen helburua hitzarmen propioa eskatzea da, pairatzen duten soldata-arrakala eta diskriminazioa ezabatzeko.

Langileek hilabeteak daramatzate mobilizatzen, baina haien proposamenek ez dute erantzunik jaso, ez Sodexo zerbitzuaren enpresa titularraren aldetik, ez Deustuko Unibertsitatearen aldetik. Hori dela eta, langileek lau greba-egun horietarako deialdia egitea erabaki dute.

Eraikinen eta lokalen garbiketa sektore feminizatua da. Langile gehienak emakumeak dira, eta haien lan-baldintzak gizonak gehiengoa diren garbiketa-sektoreen oso azpitik daude. Adibidez, bide-garbiketari dagokionez, soldata-arrakala % 41ekoa da. Enpresa eta bezero berarentzat lan eginda ere, langile horien soldata Deustuko Unibertsitateak Gipuzkoan duen egoitzakoa baino %11 txikiagoa da.

Kolektibo horren helburua ikastetxeko hitzarmen bat negoziatzea eta pairatzen duten arrakala eta diskriminazioa ezabatzea da. Lehenengo urratsa Gipuzkoako zentroaren soldata-baldintzak berdintzea izango litzateke, eta, azkenean, sektore maskulinizatuen baldintzekin berdinduko litzateke. Helburu horrek, gainera, kontratazioa hobetzea eta kontratuen finkotasuna bermatzea jasotzen du.