EAEko garbitzaileek salatu dute Eusko Jaurlaritzak ez duela ezer egiten soldata-arrakala ezabatzeko

2021/10/27
Eusko Jaurlaritzak Euskadiko Negoziazio Kolektiboko Berdintasunari buruz antolatutako jardunaldien irekiera ekitaldian (BEC), EAEko garbitzaileek erakunde publikoen hipokrisia salatu dute, soldata-arrakalari aurre egin beharrean, euren burua zuritzera mugatzen direla argudiatuta. Izan ere, ELAk Bilbao Exhibition Centre-ren aurrean deitutako elkarretaratzean gogorarazi duenez, Eusko Jaurlaritzak berak aitortu du, jardunaldi hauen aurkezpen-gutunean, lan feminizatuari maskulinizatuari baino balio txikiagia aitortzen zaiola; hori esanda ere, behatzaile hutsaren rola hartzea leporatu dio sindikatuak, euskal erakundeetatik kanpoko arazoa balitz bezala. Garbitzaileek azpimarratu dute diskriminazioaren aurkako konpromisoa erakunde publikoen menpe dauden sektoreetan soldata duinak eta berdintasunezkoak bermatuz erakutsi behar dela, eta ez helburu propagandistikoak dituzten jardunaldiak antolatuz.

Garbitzaileek gogorarazi dutenez, Eusko Jaurlaritzak eta Aldundiek egunero dute soldata-arrakalaren aurkako borrokan benetako konpromisoa dutela erakusteko aukera: Guggenheim Museoan -ekainaren 11tik greban-, garbitzaileak miseriara kondenatzen dituen Patronatuko kide baitira; komisaria eta epaitegien garbiketan, non Gipuzkoako langileak 9 hilabeteko grebara kondenatu zituzten arrakalaren aurkako borrokan; edo Osakidetzaren garbiketan. Era berean, garbitzaile talde batek greba iragartzen duen bakoitzean, Eusko Jaurlaritzak grebarako eskubidea mugatzen duten gutxieneko zerbitzuak inposatzea erabakitzen duela gogorarazi dute.

“Gaurko jardunaldietan diskriminazioa salatzen ari dira, baina diskriminazio hura bultzatzen dutenen alde egiten dute egunero”, laburbildu dute.