bizkaiko etxez etxeko banaketa

ELAk akordioa sinatu du plantillaren baldintzak hobetzeko

2024/12/12
Eroskiren azpikontratekin lortu da akordioa. Uvescorentzat (BM) lan egiten duten enpresek ez dute negoziatu nahi izan Bizkaiko etxez etxeko banaketaren hitzarmen sektorialaren negoziazioak abian jarraitzen du. Cebek patronalak BM-ren azpikontraten interesak babesten dituen bitartean, ELAk langileen baldintzak hobetzeko borrokan jarraituko du.

Abenduaren 10etik aurrera beste greba bat deitu ondoren, ELAk akordioa lortu du Bizkaiko etxez etxeko banaketako enpresa nagusiekin. Eroskik eta bere enpresek negoziatzeari ekin diote, eta langileen aldarrikapenak ere onartu dituzte. Hori dela eta, bertan behera gelditu da urtarrilaren 4ra arte aurreikusita zegoen greba. Hala ere, CEBEK patronalak eta, zehazki, BM enpresa afiliatuaren azpikontratek ez dute negoziatu nahi izan.

Eroskirenteat zerbitzua ematen duten azpikontratatutako enpresekin egindako akordioak plantillen aldarrikapen nagusiak jasotzen ditu:

  • Zehazki, ELAk lortu du hitzarmeneko kategoriarik baxuena soldatari dagokionez langile gehien dituen kategoriarekin parekatzea (gidari/banatzaileak). Gidari banatzailearen kategoriak % 6,51 igo du soldata 2024ko urtarrilaren 1etik, % 2 gehiago 2025eko urtarrilaren 1etik eta % 7,39 gehiago 2026ko urtarrilaren 1etik. Horrek esan nahi du 1400 € hamalau ordainsarietan.

  • Soldataren % 100eko osagarria lortzen da gaixotasun arruntagatiko bajetarako, eta hori 30 egunetik gorako bajetarako jaso da.

  • Antzinatasun osagarria hobetzea: osagarri horren kalkulua bi bosturteko finko izatetik hiru laurteko izatera igaro da

  • Pertsona bakoitzak lantoki bat izango du esleituta, eta horrela arautu ahal izango dira aldi baterako aldaketak.

Gauzak horrela, ELAk azpimarratu du nabarmen hobetuko direla datozen bi urteetan Bizkaiko etxez etxeko banaketako langileen zati handi baten baldintzak. Langile horiek, lehen hitzarmena sinatu aurretik, baldintza prekarioetan ari ziren, eta soldata izoztuta zuten 2017tik, LGSaren azpitik. Akordioa ezinezkoa zatekeen plantilla antolatu ez balitz eta ELAren erresistentzia kutxarik gabe.

Bizkaiko etxez etxeko banaketako hitzarmen sektorialaren negoziazioari dagokionez, aurrera jarraitzen du, baina, oraingoz, ez dago akordio batera iristeko eduki nahikorik. ELAk adierazi du blokeoaren erantzulea Cebek patronala dela, BMko azpikontraten interesak zaintzen baititu. ELAk borrokan jarraituko du azpikontratatutako langileek baldintza duinak lor ditzaten.