CECOSA

ELAk greba amaierako akordioa lortu du Eroskiko Elorrioko biltegian

2026/03/27
ELAk greba amaierako akordioa lortu du Eroskiko Elorrioko biltegian
Elorrioko Eroskiko CECOSAko biltegiko langileentzat akordioa erdietsi du ELAk (%66,66ko ordezkaritza duena). Hilabeteetako negoziazioen eta lau greba-egunen ondoren, bi aldeek hiru urterako akordioa lortu dute, eta horrek hobekuntza nabarmenak ekarriko ditu lan- eta soldata-baldintzetan.140 langile inguru aritzen dira lanean eta plantilla anitza da: %40 inguru migratutako pertsonak dira, 22 nazionalitate baino gehiagotakoak.

Akordioaren puntu nagusietako bat soldata-igoera da. Plataformako langileen kategoriak %25,42ko igoera izango du, eta garbiketako langileek %35ekoa. Gainera, gutxieneko soldata bermatua ezarri da: 22.500 euro urtean 2026rako, eta 24.906 euro 2028rako.

Bestalde, osagarri ekonomikoak (oinarrizko soldatari gehitzen zaizkion ordainsariak) ere hobetu dira. Gaueko lanagatik jasotzen den plusa %52 igoko da, eta orduko 4 eurora iritsiko da. Igande eta jai egunetan lan egiteagatik jasotzen den plusa %100 handituko da, eta orduko 12,5 euro izango da.

Horrez gain, “akordio plusa” izeneko ordainsari berria ezarri da: 263 euro 2026an, 290 euro 2027an eta 317 euro 2028an.

Lanaldian ere aldaketak izango dira: urteko lanaldia 16 ordutan murriztuko da, eta eguneroko 20 minutuko atsedenaldia lan-denbora gisa kontabilizatuko da, hau da, ordaindutako lanordu gisa.

Akordioak neurri sozial garrantzitsuak ere jasotzen ditu. Migratutako langileek 8 ordu ordaindu izango dituzte lan- edo egoitza-baimenak erregularizatzeko tramiteak egiteko. Halaber, urtean 16 ordu ordaindu izango dira senideak mediku-kontsultetara laguntzeko, eta lehen mailako ahaideen heriotzaren kasuan baimena 5 lanegunera luzatuko da.

Kontziliazioari dagokionez, eszedentziarako eskubideak zabaldu dira (aldi baterako lan-kontratua eteteko aukera, eskubide batzuk mantenduz). Borondatezko eszedentzietan lanpostuaren erreserba bermatzen da, eta adingabeak zaintzeko eszedentzia 6 urtera arte luzatzen da. Era berean, zaintzagatik lanaldi-murrizketak egun osoetan edo txanda finkoetan pilatzeko aukera emango da.

Akordioak, gainera, urtean hilabeteko lizentzia ez-ordaindua hartzeko aukera jasotzen du, zatika hartu ahal izango dena, eta 18 hilabetez lanean aritu diren langileen kontratuak mugagabe bihurtzeko konpromisoa ere bai.

Bestalde, Elorrioko lantokian euskararen erabilera sustatzeko plana abiaraziko da.

Azkenik, akordioak bermeak jasotzen ditu etorkizuneko lege-aldaketen aurrean ere indarrean mantentzeko, eta bere aplikazioa, indarraldia eta lan-baldintzak aldatzeko mugak bermatzen ditu.

ELAk oso balorazio positiboa egin du, eta azpimarratu du langileen antolakuntza eta mobilizazioa funtsezkoak izan direla lan baldintzak hobetzeko eta prekaritatea murrizteko.