ELAk GUITRANS patronalaren negoziaziorako borondate eza salatu du

Gipuzkoako salgaien errepideko garraioaren sektoreko patronalak (GUITRANS) bere proposamena aurkeztu dio sindikatu plataformari bigarren bilera egunean, hitzarmen berriaren negoziazioaren testuinguruan. Hamabost urtez Hitzarmenaren edukia eguneratu eta hobetu gabe egon ondoren, GUITRANSek negoziazioa Estatuko II. Esparru Akordioan ezarritakoaren arabera egitea planteatu du, hau da, sektoreko langile gipuzkoarren lan-baldintzek Madrilen adostutakoaren gainean erabaki eta ezartzea planteatzen du. Berriro ere, UGTk, CCOOk eta Estatuko Patronalak Madrilen negoziatzea aitzakitzat jarri du patronalak, Gipuzkoako negoziazioa baldintzatzen eta mugatzen saiatzeko.

ELAk salatu du GUITRANSek ez duela negoziatzeko borondaterik, Madrilen adostutako eta hitzartutako arauak lehenesten dituelako. ELAk exijitu dio hurrengo bilerarako argi dezala zein diren zehazki proposatzen dituen lan baldintzak. Jarrera aldaketarik egon ezean, ELAk mobilizazioaren eta borrokaren aldeko jarrera berretsi du.