LEMOAKO ERAIKIN ETA LOKALEN GARBIKETA

ELAk hitzarmen berria lortu du, %18ko soldata igoerekin

2025/02/10

ELAk akordioa lortu du Impacto enpresarekin, Lemoako Udalak azpikontrata, eraikinak eta lokalak garbitzeko zerbitzua kudeatzen duena. Hitzarmen berriak hiru urteko indarraldia izango du (2024-2026) eta, epe horretarako %18 soldata igoera jasotzen du (2025ean %12koa eta 2026an %6koa). Soldata igoera horrek jarraipena ematen dio 2023ko greba amaierako akordioan lortutako %12ko igoerari.

Gainera, akordioak beste hobekuntza batzuk jasotzen ditu, hala nola norbere arazoetarako ordaindutako bi eguneko lizentzia edo 14 orduko lizentzia ordaindua, aukeran. Enpresak lan poltsa bat sortuko du antzinatasunaren araberako lehentasun ordenarekin, eta, horren ondorioz, enpresak lanpostu berriak eskaini beharko dizkie lanaldi partziala duten eta aldi baterako kontratuak dituzten pertsonei. Hitzarmen berri horrek klausula bat du neurri guztiak ezartzen direla bermatzeko, eta, gainera, mugagabea izango da. Hau da, lan baldintzak indarrean egongo dira hitzarmen berri bat sinatu arte.

ELAk aldarrikatu du akordioa langileen antolaketari eta borroka sindikalari esker lortu dela, eta horri esker Bizkaiko Probintzia Hitzarmenaren baldintza eskasak hobetzea lortu dela.