ELAk, LABek eta ESK-k Bizkaiko eraikin eta lokalen garbiketa sektorean soldata arrakala ezabatzea exijitu dute

2021/12/16

ELAk, LABek eta ESK-k Bizkaiko eraikin eta lokalen garbiketarako hitzarmena defendatzeko manifestazioa egin dute Sestaoko Udaletxetik Portugaletera. Azaroaren 18an Basaurin hasitako mobilizazioekin jarraitzen dute, “sektore feminizatua, prekarizatua eta, ia beti, ikusezina” dela salatzeko. Hain zuzen, negoziazio honen gakoetako bat da sektoreko langileek jasaten duten soldata arrakala ezabatzea da -kale garbitzaileek baino %40 gutxiago kobratzen dute-, eta haien soldatak gutxienez 1.200 eurokoak izatea, 15 ordainsaritan. 11:15ean abiatu dira langileak Sestaoko Udaletxetik Portugaletera. Hurrengo mobilizazioa abenduaren 22an egingo da, Bilbon. Sindikatuek salatu dutenez, patronalak ez dauka sektorea duintzeko borondaterik.

Soldata arrakala ezabatzea

29.000 langile baino gehiago daude garbiketaren sektorean lanean EAEn; 26.000 (%86) eraikin eta lokalen garbiketan ari dira, non %85 emakumeak diren; 4.000 langile dira, berriz, kale garbiketan ari direnak, non %76 gizonak diren.

Kolektibo baten eta bestearen soldaten artean %40 inguruko aldea dago, kalean lan egitea konpentsatzen duen plus toxiko/nekagarri/arriskutsua alde batera utzita; beraz, argi dago eraikin eta lokalen garbiketan gutxiago kobratzen dela sektore feminizatua delako.

Soldata duinak: 1.200€ x 15 ordainsari

Negoziazio mahai honen beste aldarrikapen nagusietako bat da langileen soldatak gutxienez 1.200 eurokoak izatea 15 ordainsaritan, soldata hori funtsezkotzat jotzen baitute sektorea duintzeko.

Gainera, sektore horretan langile gehienek lanaldi partzialak dituzte. Ondorioz, langile gehienak ez dira hileko 1.000 eurora iristen.