UBER BIZKAIA

ELAk martxoaren 31ra arte luzatu du greba

2025/02/28
ELAk salatu du greba mugagabea hasi zenetik ia hiru hilabete igaro diren arren, negoziaziorako aukerarik ez dela ireki. Hitzarmena 2023ko abenduaren 31n iraungi zen, eta egungo baldintzak hobetuko dituen hitzarmen berri baterako negoziazioa blokeatuta dago. Uberren plantilla greban dago abenduaren 11tik.

Bizkaiko Uberreko gidariak greban daude abenduaren 11tik; lehenago akordiorik lortu ezean ELAk martxoaren 31ra arte luzatu du deialdia. Nominetan akatsak, ibilgailuen egoera kaskarra eta lan egindako ordu guztiak ez dizkietela ordaintzen salatzen dute langileek.

Bizkaian, Ares Capital enpresak kudeatzen du Uber, Moove Cars-en parte dena aldi berean. Plantilla osatzen duten 220 langile ingururen aldarrikapen nagusiak dira soldata handitzea (benetako lanorduak zenbatzea), oporrak behar dutenaren arabera eskatu ahal izatea, nominak aldatzea ulergarriagoak izan daitezen, ibilgailuetan segurtasun handiagoa izatea (bai langileentzat, bai erabiltzaileentzat), autoak enpresaren instalazioetan aparkatu ahal izatea eta gaueko eta jaiegunetako plusak finkatzea.

ELAk salatu du Uberreko gidarien jarduna urteko 365 egunetakoa dela, egunean 24 orduz, astelehenetik igandera, jaiegunetan, egunez eta gauez. Gainera, soldata lanbide arteko gutxieneko soldata baino txikiagoa da. Horregatik, Uber kudeatzen duten enpresei benetako negoziazio bat eskatzen die gatazka konpontzeko. ELAk gogorarazi du Uberrek irabazi milioidunak izan dituela azken urteetan, eta hazten jarraitzeko iragarpena duela.