ELAk salatu du Euskal Herriarekiko eta euskararekiko konpromiso falta gero eta handiagoa dela

ELAko Kutxabankeko atal sindikalak gogor salatu du enpresaren utzikeria, euskararekiko konpromiso falta eta Euskal Herriarekiko errotze-galera gero eta nabarmenagoak direla.

Sindikatuaren arabera, garai batean Euskal Herrian errotuta zegoen proiektu baten erabaki-gunea gero eta urrunago dago herritik, bezeroengandik eta langileengandik. Erabakiak, gainera, gero eta gehiago Estatuko hedapenaren mesedetan hartzen direla ohartarazi du, bertako profesionalen eta euskal nortasunaren kaltetan.

ELAren iritziz, norabide horrek ondorio zuzenak ditu: bertako profesionalak bigarren mailan uztea, euskararen aldeko benetako apusturik ez egitea eta lurraldearen ezagutza zein sentiberatasuna galtzea.

Atal sindikalak bereziki azpimarratu du euskarak erakundean izan beharko lukeen lekua: “Euskara ez da apaingarri bat, ezta marketin-tresna bat ere. Gure nortasunaren, sustraien eta herriaren funtsezko parte da”.

Horren aurrean, ELAk ez du onartzen Euskal Herrian sustraitutako erakunde batek bere jatorriari bizkarra ematea. Hori dela eta, egoera salatzeko mobilizazio eta protesta ekimenei ekingo diela iragarri du.

ELAk Kutxabanki jarrera aldatzeko eskatu dio, eta euskararen hedapenean benetako urratsak emateko, bai barne-funtzionamenduan, bai bezeroei eta herritarrei begirako jardunean ere.