ELAk 'soldata-arrakala garbitu' du EAEko hiru eraikinetan

ELAk azpimarratu du administrazioaren azpikontratetan dagoen aldea ezabatzea posible dela, beti ere, borondate politikoa baldin badago. "Emakumeen eta gizonen arteko berdintasun erreala eta soldata-arrakala ezabatzea kontratazio publikoaren erdigunean kokatu behar dira. Posiblea izateaz gain, erantzukizun politikoagatik egin beharreko auzia ere bada”.
Sindikatuak azaldu duenez, eraikinen eta lokalen garbiketan hainbat azpisektore daude, eta horietako bakoitzak dagokion hitzarmena aplikatzen du. Arabako, Bizkaiko eta Gipuzkoako hiru probintzia-hitzarmenak daude soldata txikienekin, eta hortik aurrera garbiketen azpisektoreak daude, hala nola Osakidetzarena, Hezkuntzarena, ertzain-etxeena, epaitegiena, etab. Izan ere, azken horietan soldatak administrazioko langile propio gisa lan eginez gero legokiekeenekin parekatu zituzten. "Horiek guztiak sektore feminizatuak dira, ia % 90 emakumeak dira, eta kasu guztietan soldata-arrakala dago kale-garbiketaren eta zabor-bilketaren sektoreekin alderatuz gero", salatu dute.
Gogorarazi dute kale-garbiketa gehienbat azpikontratatutako sektorea dela, eta gauza bera gertatzen dela eraikinen eta lokalen garbiketarekin; azken kasu horretan, ordea, azpikontratazioa publikoa izateaz gain, pribatua ere bada.
Eremu pribatuari dagokionez, ELAk gogorarazi nahi du berdintasun-printzipioa EAEko enpresa pribatuek formalki babesten duten printzipioa dela. Egiteke dagoena berdintasun materiala lortzea da, eta horretarako neurri zehatzak hartu behar dira negoziazio kolektiboaren bidez.