Enpresak langileen grebarako eskubidea urratu du azaroaren 11n

2026/11/13

Enpresak gehiegizko gutxieneko zerbitzuak ezarri zituen eta greban zeuden langileak legez kontra ordezkatu zituen. ELAk Lan Ikuskaritzan salatuko du gertatutakoa, eta egokitzat jotzen dituen neurriak hartuko ditu.

ELAk salatu du La Union autobus enpresak langileen grebarako eskubidea urratu duela azaroaren 11ko greba orokorrean. Enpresak, deialdia hasi eta 24 ordu baino gutxiago falta zirenean, abusuzko gutxieneko zerbitzuak jakinarazi zituen, azaroaren 6an argitaratutako Eusko Jaurlaritzaren Aginduan ezarritakoa baino askoz haratago zihoazenak. Ezarritako gutxieneko zerbitzuez gain, enpresak beste enpresa batzuetatik datozen errefortzuko langileak erabili ditu lanpostu jakin batzuk betetzeko, eta, horrela, plantillatik kanpoko langileak sartu ditu greba egun batean.

ELAren ustez, jarduera hori bereziki kezkagarria da kontuan hartzen badugu La Unionek ikerketa bat irekita duela Lan Ikuskaritzan, oso antzeko gertakariengatik, hain zuzen, 2026ko martxoaren 17ko greban gertatutakoak.

Sindikatuak errefusatu ditu gehiegizkoak izan diren gutxieneko zerbitzuak, grebaren eragina minimizatu nahi zutela argudiatuta.

"Jakin badakigu garraio publikoaren ezaugarriak direla-eta, gutxieneko zerbitzu batzuk bermatu behar direla, herritarren funtsezko premiei erantzun ahal izateko. Hala ere, hori ezin da aitzakia bihurtu neurriz kanpoko zerbitzuak ezartzeko, ezta grebarako eskubidea urratzeko ere ", deitoratu du ELAk.