Gipuzkoako Foru Aldundiko azpikontratatutako garbitzaileek mobilizazioekin jarraitzen dute

2022/03/22
Lau greba egunen ondoren -otsailaren 22tik 25era-, ELAk, LABek eta ESK-k mobilizazioekin jarraitzen dute Gipuzkoako Foru Aldundiaren eraikinen garbiketan -EULENi azpikontratatutako zerbitzua da, eta %90 emakumeak dira-, KPIari lotutako soldata igoerak eskatzeko. Hori dela eta, langileek elkarretaratzea egingo dute EULENen atarian, Donostian. 2021eko maiatzetik ari dira hitzarmena negoziatzen, eta enpresak ez du aurrerapenik eskaintzen arlo ekonomikoan. EULENek azpimarratu du ez duela KPIri lotutako planteamendu ekonomikorik egingo, eta horrek erosteko ahalmenaren galera larria dakarkiela langileei.

ELAk, LABek eta ESK-k deitoratu dute EULENek uko egin izana KPIa bermatzeari, urtean milioi askoko irabaziak lortzen dituen bitartean. Hala, KPIari lotutako planteamendu ekonomikoa eskatu diote enpresari eta bere erantzukizuna onartzea Gipuzkoako Foru Aldundiari, zerbitzuaren azken arduraduna baita. “Administrazioaren erabaki politiko eta ekonomiko baten ondorioz azpikontratatutako langileak gara, beraz, haiek dira gure zerbitzuaren azken arduradunak”, kexu dira langileak .

Horregatik, gatazka konpontzeko inplikazioa eskatu diote Aldundiari, “haien esku baitago diru publikoa enpresa pribatuen esku uztea edo langileen eta horiek eskaintzen duten zerbitzuaren mesedetan erabiltzea”.

Era berean, greba deialdietan gutxieneko zerbitzuak eskatzeko orduan funtsezkotzat jotzen badira, lan eta bizi baldintza duinak izateko ere funtsezkoak direla gogorarazi dute.