EHUNGINTZA ETA OINETAKOEN GREBA

Jarraipen zabala Bizkaian eta Gipuzkoan, Hego Euskal Herrian hitzarmen probintzialak nagusi izan daitezen eskatzeko

2024/12/26
Bizkaiko eta Gipuzkoako ehungintza eta oinetakoen sektoreko langileek beste greba egun bat egin dute probintzia hitzarmenen alde, eta mobilizazioak egin dituzte Bilbon eta Donostian. Beste behin ere, sektoreko langileak kalera atera dira patronalari (ARTE) eskatzeko estatuko hitzarmena ez aplikatzeko eta Hego Euskal Herrian hitzarmen probintzialak aplikatzen jarraitzeko. Jarraipena oso zabala izan da, dozenaka dendek itxi behar izan dute eta beste askok partzialki itxi dute, edo gutxieneko langile kopuruan lan egin behar izan dute. Hori guztia salatu du ELAk, grebalariak ordezkatzeko saiakerak eta sektoreko marka handietako langile askok grebarekin bat ez egiteko jaso dituzten presioak gorabehera.

ELA zuzenean harremanetan egon da ARTE patronalarekin, eta estatuko hitzarmena ez aplikatzeko aldarrikapena aintzat hartuko zutela zirudien arren, azken unean enpresek atzera egin zuten. Langileak atsekabetuta daude uda baino lehen ARTE patronal berriak iritziz aldatu duelako. Patronal hori ehungintzaren sektoreko marka handiek osatzen dute (Inditex, H&M, Mango, Tendam Retail, Kiabi eta Primark, besteak beste), eta 2023ko uztailean ehungintzako eta oinetakoen merkataritzako marka handien lehen hitzarmen estatalaren negoziazioa sustatu zuen.

ARTE patronalaren estatuko hitzarmena Hego Euskal Herrian aplikatuko balitz, sektoreko langileen lan baldintzak ez ezik, hitzarmen probintzialen negoziazioa bera ere jokoan egongo litzateke. Beraz, langileak irmo daude eta mobilizazioekin aurrera jarraituko dute ARTE patronalak Estatuko hitzarmenetik kanpo uzten dituen arte.

Orain arte, greba egun ugari egin dira, eta Hego Euskal Herriko sektoreko denda asko itxi egin dira.