Langile gehienek bat egin dute Gipuzkoako Foru Aldundiaren eraikinetako garbitzaile azpikontratatuen grebarekin

2022/02/22

ELAk, LABek eta ESK-k greba deitu dute otsailaren 22, 23, 24 eta 25erako, EULENek –Gipuzkoako Foru Aldundiko eraikinen garbiketa zerbitzuaz arduratzen den azpikontratak– langileen erosteko ahalmena ziurtatzeari uko egiten diola salatzeko. EULENek uko egiten dio KPIri lotutako soldata planteamendurik egiteari, eta horrek langileen pobretzea sakontzen du. Langile gehienek bat egin dute deialdi honekin.

Bilera batzuen ondoren, negoziazioa blokeatuta dago. EULENek, KPIarekin inolako loturarik egiteari uko egiteaz gain, 2021ean langileen soldata izoztea proposatu du. ELAren iritziz, jarrera hori onartezina da, are gehiago kontuan hartuta pandemia betean zerbitzua ematen jarraitzeaz gain, indartu ere egin dela.

ELAk deitoratu egin du patronalak soldatetan KPIarekin lotura egitea sektore maskulinizatuetan, feminizatuetan hori egiteari uko egiten dion bitartean. Hori da Aldundiaren mendeko eraikinak garbitzeko zerbitzuaren kasua, azpikontratatutako zerbitzua baita eta, gehienetan, emakumeek osatzen baitute.

Era berean, ELAk eskatu du Foru Aldundiak, zerbitzu horren arduradunak, zerbitzu horren konponbidean parte har dezala. Langile horiek Aldundiak berak hartutako erabaki politiko eta ekonomiko baten ondorioz daude azpikontratatuta, eta erabaki hori estrategia ekonomizista bati baino ez dagokio.