Azpikontratatutako osasun-garraioko langileen txertaketa eskatu dute Donostia Ospitalean egindako manifestazio batean

2021/02/17

ELA, LAB, UGT, CCOO, USO eta CNTk anbulantzia-zerbitzuaren azpikontratazio-politikaren ondorioak salatu dituzte, eta 1.500 profesionalek osatutako kolektiboa "bigarren edo hirugarren kategoriako langile" gisa tratatzen ari direla adierazi dute, Osakidetzak zuzenean kontratatutako langile ia guztiak txertatuta daudela gogoraraziz.

ELA, LAB, UGT, CCOO, USO eta CNTk Osakidetzak azpikontratatutako garraio sektoreko osasun teknikariei txertoa jartzeko eskatu diote Eusko Jaurlaritzari. Donostiako Ospitalearen aurrean egindako manifestazio batean, sindikatuek gogorarazi dute, beste behin ere, Bizi Euskarri Aurreratua, Oinarrizko Bizi Euskarria eta Garraio Programatua duten anbulantziek egunero lekualdaketa ugari egiten dituztela COVID-19 kasuak direla eta, askotan baldintza kaskarretan eta kutsatzeko arrisku handia dutela. Azpikontratatutako langileak izateagatik jasotzen duten "tratu diskriminatzailea eta iraingarria" azpimarratu dute. Izan ere, Osakidetzako langileek, anbulantzietakoak barne (% 1), txertoa jarrita dute dagoeneko. Hala ere, enpresa pribatuen esku dauden langileen % 99k zain eta berririk gabe jarraitzen dute.

Hala, anbulantzien zerbitzua azpikontratatzeko politikaren ondorioak salatu dituzte, eta 1.500 profesionalek osatutako kolektiboa "bigarren edo hirugarren kategoriako langile" gisa tratatzen ari direla ziurtatu dute. Osasun Sailari errespetua eta berdintasunezko tratua eskatzen diote, borrokaren lehen lerroan egon arren, Administrazioak gaizki tratatzen dituela iritzita.