GEBISAko (A8) langileen lanuztea ostiralean

2014/04/02
GEBISAko (A8) langileen lanuztea ostiralean
A8 autobidea Bizkaian kudeatzen duen GEBISA enpresako langileek lanuzteak egiteari ekingo diote, hitzarmen kolektiboaren alde. Lanuzte egin zuten martxoaren 31n eta apirilaren 4rako deitu dute beste bat, bi orduz goizean, eta beste bi orduz arratsaldean. Aste honetako ostiralean 07:30etatik 09:30ak arte, eta 17:30etatik 19:30ak arte. Gaur Batzar nagusien aurrean elkarretaratu dira.

Langileek mobilizazioetara jo behar izan dute, akordio bat lortzeko enpresaren borondate eskasa dela-eta. Langileek azaroan aurkeztu zuten beren plataforma, eta erantzuna bi hilabete eta erdi geroago jaso zuten.

Zuzendaritza lan-erreformaz baliatu nahi da, Bizkaiko Foru Aldundiak azaroan eman zuen Jarraibide Teknikoari jaramonik egin barik. Eta hori oso larria iruditzen zaigu, zeren alde batetik erreformaz baliatzen dira lan-baldintzak hondatzeko, eta bestetik, ez diote jaramonik egiten Bizkaiko Foru Aldundiari (A8 autobideko Bizkaiko zatiaren jabea). Eta hortxe ikusten da zein jarraipen eskasa egiten dien Aldundiak bere kontratei.

Horrez gain, enpresak soldata-eskala bikoitza sartu nahi du; eta ondorioz, lehen, bigarren eta hirugarren mailako langileak egongo dira. Hori harrigarria egiten zaigu, Gebisak eskala bikoitza sartu nahi izatea Bizkaiko Foru Aldundian.

Hori gutxi balitz bezala, langileek denboran zehar lortu izan dituzten eskubideak baztertzen eta indargabetzen saiatzen dira.

Langileek, gainera, hitzarmena zaindu behar dute, eta lan-erreformatik blindatu; baina enpresa ez dago prest blindaje hori onartzeko. Hori dela-eta, lanuzteak egiteko deia zabaldu behar izan dugu, geure burua zaintzearren.

Ez dugu ahaztu behar enpresak orain dela urtebete baino gutxiago lortu zuela enkante hau, eta KPIrekin loturiko berrikuspena egingo diotela. Horrek pentsarazten digu enpresaren sakelak gizendu nahi dituztela, gure lan-baldintzen kontura.