Siemens-Gamesa Agoitzeko Enpresa Batzordeak salatu du, hirugarren bilera amaituta, enpresak ez duela oraindik sindikatuek eskatutako informazio guztia eman

Gaur, 2020ko uztailaren 23an, enpresak aurkeztutako langile guztientzako enplegu-erregulazioko espedientearen kontsulta-aldiko hirugarren bilera egin da. Bilera horretan birkokatze-enpresa bat izan da, eta, beraz, Siemens Gamesak bete egin du enplegu-erregulazioko edozein espedientetako prozeduretan eskatutako izapide formal hori.

Enpresa-batzordea, aurreko bileretan egin duen bezala, prest agertu da alternatibak baloratzeko, baina ez itxierako enplegu-erregulazioko espediente baten esparruan, ezinbestekotzat jotzen baitu lantegiaren jarraipena bermatzea. Ondorioz, sindikatuek berretsi egin dute erregulazio-espedientea kentzeko eskakizuna, Agoitzeko lantegia lehiakorra eta produktiboa dela oinarri hartuta, eta salatu dute konpainiak emandako arrazoiek ez dutela inola ere justifikatzen itxiera.

Ildo beretik, Batzordea prest agertu da negoziazioan kanpoko eragileen inplikazioa aztertzeko, enpleguari eusten zaiola bermatzeko. Hori dela eta, Batzordeak Nafarroako Gobernua enpresa ixtea saihesteko inplikatzera deitu du, deslokalizazio kasu argi bat delako. Gogoratu behar da enpresa honek milioika euro jaso dituela diru publikotik, eta, gainera, ixteak Nafarroako Pirinio aurreko zonaldeak pairatzen duen langabezia eta despopulazio arazoa areagotuko luke. Foru Gobernuaren, Gobernu Zentralaren eta Siemens Gamesako zuzendaritzaren arteko gaurko bilerari dagokionez, Enpresa Batzordeak Nafarroako Gobernuari eskatu dio itxieraren aurkako jarrera berresteko.

Bileran, Enpresa Batzordeak berriz ere eskatu dio enpresari informazioa, enpresak emandako arrazoiak aztertu ahal izateko. Tamalez, enpresak uko egin dio eskatutako informazio guztia emateari, eta horrek Batzordeari berresten dio ez dagoela itxiera justifikatzen duen arrazoirik.

Azkenik, Batzordeak jakinarazi du hurrengo negoziazio-bilera uztailaren 29an izango dela.