ASKATASUN SINDIKALA

Justiziak bertan behera utzi du Bilboko Udalean protesta egiteagatik Accionako langile bati ezarritako isuna

2026/06/12
Justiziak bertan behera utzi du Bilboko Udalean protesta egiteagatik Accionako langile bati ezarritako isuna
ELAri arrazoia eman dion epai irmo batek aitortu du protesta lan gatazkaren testuinguruan egin zela, eta adierazpen askatasunaren eta jarduera sindikalaren babesa berretsi du.

Justiziak arrazoia eman dio ELAri eta baliogabetu du 2025eko irailean Bilboko Udalaren osoko bilkuran egindako protestan parte hartu zuen Accionako langile bati ezarritako isuna. Langileak udalaren estolderia-sarea garbitzeko eta kontserbatzeko zerbitzuaren esleipedunak dira, eta gatazka irekia zuten une hartan.

Orduan salatu zuten hamahiru urte zeramatzatela soldatak izoztuta, soldatak KPIra eguneratu gabe, eta alkateari beren aldarrikapenak helarazteko beste biderik aurkitu ez zutenez, langile talde batek gatazka udal osoko bilkuran ikusgarri egitea erabaki zuen. Horietako batek A3 tamainako kartel bat erakutsi zuen, honako mezuarekin: “Saneamendu Zerbitzua: 13 urte soldatak igo gabe eta KPIrik gabe”. Protestaren ondoren, langileak osoko bilkuratik kanporatu zituen alkateak eta langile horri 601 euroko isuna ezarri zion Udalak.

Epai irmoak berariaz aitortzen du zigortutako gertakariak lan gatazka eta aldarrikapen sozialeko testuinguru batean gertatu zirela, eta azpimarratzen du egoera horietan adierazpen askatasunak babesa duela. Era berean, ebazpenak gogorarazten du botere publikoek ezin dutela administrazio-zehapena modu automatikoan erabili protesta deserosoak isilarazteko, eta neurri hori benetako larritasuna duten jokabideetarako bakarrik gorde behar dela.

Isunaren aurkako helegitea aurkeztu ondoren, epaitegiak langilearen alde egin du eta zehapena indargabetu du. ELAren ustez, ebazpenak garaipen garrantzitsua dakar langile klase osoarentzat eta oinarrizko eskubideen defentsarentzat.

Halaber, administrazioek beren ahalmen zigortzailea jarduera sindikala eta lan baldintza duinen aldeko mobilizazioak kriminalizatzeko erabiltzen dituzten estrategien aurkako zuzenketa irmoa dela dio ELAk. Ildo horretan salatu du Mozal Legea bezalako tresnak sarritan erabili izan direla langileak beldurtzeko, desmobilizatzeko eta protesta egiteko eskubidea mugatzeko, eta gogorarazi du eskubide hori oinarrizkoa dela eta behar bezala babestu behar dela.