Gipuzkoako Diputazioak bere gain hartzen du Errepideetako Negurako Plan prekario eta arriskutsua

Pasa den Azaroaren 10ean Gipuzkoako Foru Aldundiak egin zuen 2016-2017ko Errepideetako Negurako Planaren aurkezpenaren harira, ELAtik  Diputazioak iazko planeko irregulartasunak konpontzeko azaldu duen erabateko utzikeria salatu nahi dugu. ELAk frogatu zituen aipatutako irregulartasunak, eta gaur egun, langileen zein erabiltzaileen segurtasuna bermatuko duen erantzun baten zain jarraitzen du. Hori dela eta, aurretiaz gure aldarrikapenei irtenbiderik eman gabe Errepideetako Negurako Plan berri hau aurkeztu izana salatu nahi dugu. Izan ere, ezinezkoa deritzogu erabiltzaileen segurtasuna bermatu ahal izatea mantenu zerbitzu horietaz arduratzen diren langileen segurtasuna bermatzen ez bada.

Bestalde, urte honetako Errepideetako Negurako Planean planteatu diren neurriak gehiago zehaztea eskatzen dugu, bertara bideratu diren giza baliabideak ia erdira jaitsi baitira iaztik hona (aurreko urtean 322 langile bideratu ziren, eta aurten, berriz, 180). Horregatik, ELAk eszeptizismoz begiratzen ditu Diputazioaren oinarrizko interesak: Segurtasuna lehenesten al du? Prekarietateari jarraitasuna emateko asmoa al dauka?

*Zenbateko osoa (elurra kentzeko kamioien eta ibilgailu arinen gidariak, gruistak, kontrol zentroko pertsonala, arduradunak, segurtasun ekipoak, etb..).

Horregatik guztiagatik, Gipuzkoako Foru Aldundiak aurtengo Errepideetako Neguko Planean ezarritakoa zehaztasunez ezagutzea helburu, ELAk errepideetako mantenuko enpresen zuzendaritzei Lan Harremanen Kontseiluan (PRECO) biltzeko deialdia luzatzen die. ELAk ez du inoren bizia arriskuan jarri dezakeen murrizketarik onartuko, eta errepideetako baldintza eta segurtasun arauetan, lan segurtasunean, eta lan hitzarmenean ezarritakoa aplikatzea exijitzen du.