Behin-behinekotasunak lau pertsonatik bati eragiten dio dagoeneko

2021/10/28
Behin-behinekotasunak lau pertsonatik bati eragiten dio dagoeneko
Hirugarren hiruhilekoko Biztanleria Aktiboaren Inkestaren arabera, okupazioak hobera egin du, behin-behinekotasuna handitu delako; hala ere, langabeziaren datuek ez dute hobera egin. Inkestaren arabera, 137.400 langabe daude, aurreko hiruhilekoan baino 3.000 gehiago (+%2,2). Hala ere, biztanleria aktiboaren hazkundearen ondorioz, langabezia-tasa ez da %10,1etik mugitu Hego Euskal Herrian. Nafarroan lau hamarren igo da, %10,7ra arte, eta EAEn hamarren bat jaitsi da, honela %10eko mugatik berriro ere jaitsiz. 2019ko hiruhileko berarekin alderatuta, gaur egun 16.600 pertsona gehiago daude langabezian; beraz, egoera ez da batzuek dioten bezain ona. Are gehiago Europar Batasunarekin alderatuz gero, EBko langabezia-tasa HEHkoa baino 3,3 puntu txikiagoa baita.

Landunak 25.700 gehiago dira aurreko hiruhilekoaren aldean; enpleguaren igoera horrek sektore guztietan izan du eragina, nekazaritzan izan ezik. Beste behin ere, enpleguaren sorrera zerbitzuen eta industriaren sektoreetan izandako gorakadatik dator; izan ere, azken hiruhilekoan 19.300 eta 9.900 hazi dira, hurrenez hurren.


Datuek positiboak diruditen arren, esan beharra dago okupazioaren igoera, neurri handi batean, aldi baterako enpleguaren sorreratik ere datorrela. Datuek erakusten dutenez, okupazioan adierazitako gorakadatik 15.100 pertsona aldi baterako kontratukoak izan dira. Beraz, behin-behinekotasuna ia %25era igo da HEHn, Europar Batasunean baino 10 puntu gehiago.


Hamar urte igaro dira lan-erreforma aplikatu zenetik. Ez dago zalantzarik erreforma horren ondorioak kaltegarriak izan direla langile-klasearentzat: behin-behinekotasuna handitzea, estatalizazioa, kaleratzea merkatzea, etab. Horregatik, ELAk lan-erreforma erabat indargabetzea exijitzen du, beste behin ere, langile-klasearen lan-baldintzak duintzeko funtsezko urrats gisa. Hori, laneko prekarietatearekin amaituko duen neurriekin eman behar da, baita beste enplegu politika batzuekin ere.