Joseba Villarreal Alternatiben Herriko “Prekarietatearen aurreko alternatibak” mahai-inguruan

2015/10/24

AuzoEKOnomian, 18:00etan, mahai-inguru bat izan da, “Prekarietatearen aurreko alternatibak” izenarenpean. Horretan, beste sindikalistekin batera, ELAko Negoziazio Kolektiboaren arduradun Joseba Villarrealek hartu du parte. Hitza hartu duenetan Villarrealek prekarietatea jo du oraingo lan-merkatuaren arazo nagusitzat, bai sektore pribatuan, bai publikoan; eta gaineratu du ez dugula normaltzat hartu behar azken batean patronalaren eta gobernuen apustu estrategiko bat baino ez dena.

Villarrealek, halaber, prekarietatearen alderdi guztiak erakutsi dizkigu: langabezia, soldata ziztrinak, gogoz kontrako lanaldi partzialak, emakumeen soldata-diskriminazioa, malgutasuna areagotzea, azpikontratazio basatia, “outsourcing” enpresak ezartzea, ABLE/ETTak modu irregularrean erabiltzea, aparteko ordu ordaingabeak…

ELAko Negoziazio Kolektiboko arduradunak azpimarratu du, zailtasunak zailtasun, errealitate horri aurre egin behar diogula, zuzenean pairatu behar dutenek ez ezik, gainerako guztiok ere bai, etorkizun hori langile guzti-guztioi ezarri nahi digutelako.

Ildo horretaik, ELAren alternatiba zehaztu du: horrelako egoerei aurre egiteko abagunea bilatu, eta langileak enpresetan eta sektoreetan antolatu, lan-eskubideak hobeto defendatzeko. Gero gogora ekarri digu zein izan diren azken urteotako ELAren ekarpen berriak: Gipuzkoako Aldundiak onetsitako araua, eraikuntzaren hitzarmenaren aplikazioa bermatzeko; eta, baita ere, Nafarroako Parlamentuak onetsitako LHE/ILP, Gasteizkoan izapidetze bidean, azpikontratetako langileei gutxieneko baldintzak ziurtatzeko. LHE/ILPren haritik, Villarrealek esan digu behar-beharrezkoa dela botere politikoa tartean sartzea prekarietatearen aurkako borrokan.

Espero izatekoa zenez, ELAko Negoziazio Kolektiboaren arduradunak, bere partehartzea amaitzeko, dei egin digu antolamendua eta borroka egitera, eta norabide horretan indarrak batzera bultzatu gaitu.