MIKEL ZABALZA

ELAk Mikel Zabalza gogoratzeko ekitaldiak babesten eta parte hartzen du, haren hilketatik 40 urte bete direnean

2025/11/28
ELAk Mikel Zabalza gogoratzeko ekitaldiak babesten eta parte hartzen du, haren hilketatik 40 urte bete direnean
ELAk babes eta parte-hartze aktiboa du egun hauetan ‘Mikel Zabalza, 40 urte gogoan’ lelopean antolatu diren ekitaldietan. Jakina denez, Mikel Zabalza duela 40 urte hil zuten Guardia Zibilak Donostian (autobus-txofer gisa lan egiten zuen hirian) atxilotu ostean, eta polizia-torturaren biktima gisa ofizialki aitortua izan arren, ez dira erantzukizunik argitu eta ez da inor epaitu haren heriotzagatik.

Hainbat kolektibok, horien artean Egiari Zor, Torturatuen Sarea, Dbuseko langileak eta Altza, Aezkoa eta Bortzirietako talde herrikoiak (baita Mikel Zabalzaren senideek ere) ekitaldi egutegi bat bultzatu dute. Besteak beste, igande honetan, azaroak 30 (12:00), omenaldia egingo zaio Orbaitzetako Olan, bere jaioterrian. Mikel Zabalza ELAko afiliatua zen.

ELAk Euskal Herrian egingo diren ekitaldi guztietan parte hartzeko deia egin du. Autobus batek Mikel Zabalza kasuari buruzko erakusketa bat eramango du hainbat herritara, eta azken geltokia Donostiako Boulevarrean izango da abenduaren 14an (12:30). ELAk, 40 urte geroago, Estatuak Mikel Zabalzaren atxiloketa eta hilketa iker ditzala eta horretarako beharrezko neurriak har ditzala eskatu du (dokumentuen desklasifikazioa eta abar).