ELAk dei egin die Nafarroako Gobernuari, patronalari eta gainerako sindikatuei inolako kolektiborik baztertzen ez duen esku-hartze sozialeko hitzarmen bat adosteko

2020/11/12
ELAk ohartarazi du negoziazioan bere aplikazio-eremutik kanpo utzi nahi direla sektoreko hainbat kolektibo (gizarteratzea eta laneratzea, eta lankidetzan eta garapenerako laguntzan aritzen diren kolektiboak, droga-mendekotasunari arreta ematea). Nafarroako Gobernuak hitzarmen kolektiborako 10 milioi euroko aurrekontu-partida dagoela iragarri ondoren, ELAk uste du aurrekontu-sail hori Hitzarmena sektoreko langile guztientzat izatearen baldintzapean egon behar dela.

Bihar, azaroak 13, esku-hartze sozialeko hitzarmenaren mahaiaren beste bilera bat egingo da. ELAren ustez, Nafarroako Gobernuak hitzarmenerako finantzaketa dagoela iragartzea lan-baldintzak duintzeko baliatu beharreko aukera bat da. Ildo horretan, gogorarazi behar da guztiz baldintza eskasak dituen sektorea dela, pertsonen bazterkeria- eta kalteberatasun-arazoei aurre egiten diena, eta herritarren funtsezko beharrak hamar urte baino gehiago izoztuta daramaten soldatekin estaltzen dituena.

Bileran, ELA sindikatuak negoziazioaren hasieratik patronalari eta gainerako sindikatuei eskatzen ari dena errepikatuko du; izan ere, aplikazio-eremuan sektoreko langile guztiek egon behar dute. ELAren ustez, negoziazio horrek ezin du gehiago aurrera egin, baldin eta sektoreko langileen kolektibo bat, hala nola gizarteratze- eta laneratze-arloko langileak eta garapenerako lankidetzan eta laguntzan eta droga-mendekotasunari arreta ematen diharduten kolektiboak, aplikaziotik kanpo uzten baditu.

ELAren iritziz, lehen hitzarmen honek Nafarroako sektore horretako langile guztiak hartu behar ditu barne, beste edozein irtenbidek sektorearen prekarietatea iraunaraztea eta pertsonen bizi-kalitatearen alde eta horretarako lan egiten duten langileen arteko diskriminazioak areagotzea ekarriko baitu.

Hori guztia dela eta, ELAk aukera historiko hori aprobetxatzeko eskatu die gainerako sindikatuei, Nafarroako Gobernuari eta patronalei, esku-hartze sozialeko langileentzat lehen hitzarmen bat ezartzeko, haien lan-baldintzak hobetuko dituena eta kolektiborik baztertuko ez duena.

Azkenik, ELAk sektoreko langile guztiei dei egiten die ELA sindikatuak datorren astearterako, azaroak 17, deitutako zaintza sektoreetako greba laguntzeko.