Soldata eta enpleguaren defentsan mobilizazio asteari ekin dio ELAk

2014/06/10
Soldata eta enpleguaren defentsan mobilizazio asteari ekin dio ELAk
ELAk negoziazio kolektiboaren inguruko mobilizazio asteari ekin dio gaur Gasteizen. Ekitaldia manifestazio batekin amaitu da patronalaren egoitzaren aurrean. Herrialde bakoitzean ekitaldi nagusi bat izango da: 11n Tolosan, 12an Bilbon eta 13an Iruñean. Adolfo Muñoz “Txiki", idazkari nagusiak adierazi du negoziazio kolektiboetan jasotzen diren “eskubideak ez dira bere kabuz goitik etortzen, langileen borroken ondotik baino”.

Joseba Villarreal, negoziazio kolektiboko arduradunak egoeraren azterketa egin du. Gaur egun negoziazio kolektiboa blokeatuta dagoela , eta patronala dela horren arduraduna adierazi du. “Batetik edukietan blokeatzen du eta, bestetik, ordezkaritzaren monopolioaren bidez. Bizkaiko Ehungintza Merkataritzan gertatu dena horren lekuko argia da”.

Adolfo Muñoz “Txiki”k bere aldetik sindikatuak soldatez eta enpleguaz bultzatu duen kanpainaren garrantzia nabarmendu du eta gogor kritikatu du patronala, langileei xantaia egiteko, langabezian oinarritzen direlakoan “Frogatzen ari gara emaitza onuragarriak lor daitezkeela erreformak eta guzti, bai sektore-negoziazioan, bai enpresa-mailako negoziazioan. Hainbat sektoretan erreforma aurkako klausulak hitzartu ditugu, eta KPIri loturiko soldata-erreferentziak".

Bestalde, patronala negoziazio kolektiboa ahultzen ahalegintzen ari dela eta bere helburua banakako negoziatzea dela lan baldintzak inposatzeko, azpimarratu du.